Basha tenton bashkimin e demokratëve

Kreu i PD-së e shfrytëzoi 23 vjetorin e përkujtimit të vdekjes së Azem Hajdarit për të bashkuar demokratët në betejën e tij kundër maxhorancës. Berisha gjithashtu  e përkujtoi deputetin e vrarë për t’u bërë thirrje demokratëve në një tjetër luftë: atë për ta kthyer PD-në në epokën para Bashës

Përjashtimi i Sali Berishës nga Grupi Parlamentar, e vuri kryetarin në mes të një stuhie zemërate të demokratëve që kanë parë tek ish-kryeministri gjithnjë  frymën e Partisë Demokratike.

Megjithatë Lulzim  Basha, u përpoq t’i bënte demokratët sërish bashkë përmes emrit të një themeluesi tjetër. Në përkujtimin e 23 vjetorit të vdekjes se Azem Hajdarit, kryedemokrati e cilësoi veprën dhe sakrificën e deputetit të vrarë si model frymëzimi për të mos iu nënshtruar dhunës  së regjimit.

Vetë Basha prej 2019-s flet për instalimin e një regjimi, akuza që i theksoi edhe gjatë seancës së parë të legjislaturës së re parlamentare. Deklarata këto të lëshuara në mesin  një krisjeje brenda PD-së, ku ish-lideri demokrat akuzon Bashën se ka marrë vendime për hir të interesave personale dhe ka hedhur dyshime për një bashkëpunim mes kreut të opozitës dhe kreut të qeverisë. Basha flet për një regjim të kryeministrit Rama në bashkëpunim me krimin dhe premtoi edhe njëherë për demokratët se PD nuk do t’i njohë zgjedhjet e 25 Prillit.

“Mirënjohja dhe krenaria për Azem Hajdarin na bashkon, sidomos kur fatet e demokracisë janë të pasigurta dhe perspektiva europiane e Shqipërisë kërcënohet nga regjimi i pakicës së korrupsionit dhe krimit”, do të shprehej Basha përmes një mesazhi, ndërsa kreu homazhe në bustin e zotit Hajdari.

Kreu i selisë blu lëshoi thirrjen  për bashkim në këtë luftë “deri në triumfin e lirisë dhe demokracisë”, duke e parë figurën e zotit Hajdari si një shembull të lirisë.

Me të njëjtat cilësime, prej tribuni për Azem Hajdarin – i cili mbeti i vrarë para selisë së PD-së më 12 shtator të 1998-s – ka folur edhe zoti Berisha.

“Demokrate, tribuni ynë sot na thërret: Kokën Lart!”, shkruante Berisha duke u bërë thirrje demokratëve. Ndërsa e cilësoi si vrasjen e shekullit dhe hakmarrje ndaj lirisë, përmes figurës së Hajdarit dhe jehonës së dikurshme “Azem ti je gjallë!” – me të cilat demorkatët bënë një sërë protestash më  ’98 – Berisha e përdori kujtimin e deputetit të ndjerë për ndryshime brenda PD-së.

“Kujtimi i Ndritur i Azem Hajdarit është kushtrim për çdo demokrat dhe demokrate, anëtarë të thjeshte, mbështetës të Partisë Demokratike, drejtues të  strukturave të  saj në të gjitha nivelet e institucioneve të  saj të  rikthejnë me urgjence Partine Demokratike mbi parimet bazë mbi të cilat ajo u themelua nga Azem Hajdari dhe studentët liberator të mbrojtjes së lirive dhe të të drejtave njerëzore dhe interesit kombëtar të shqiptareve dhe shndërrimin e saj në një lokomotivë të integrimit të Shqipërisë në BE”, shkruante Berisha, ndërsa  e cilësoi Bashën si vegël mjerane të kryeministrit Rama.

Ish-kryeministri Berisha, i shpallur “non grata” nga Departamenti Amerikan i Shtetit u bëri sërish thirrje demokratëve, përmes rrjeteve sociale. Duke postuar videon, ku kreu i PD-së lajmëroi përjashtimin e Berishës nga Grupi Parlamentar  Demokat, deri në sqarimin e ccështjes, kërkoi bashkim të demokratëve kundër  këtij vendimi.

“Të dashur anëtarë dhe anetare të Partisë Demokratike, asnjë largim nga radhët e saj, por tw gjithë sw  bashku për tw hedhur nw  koshin e plehrave vendimin antistatutor, amoral, poshtërues dhe fund e krye për interes personal tw pengut Lulzim Basha”, shkruante Berisha.

Sipas Bashës, Departamenti Amerikan i Shtetit e kishte të panegociueshëm kushtin për përjashtimin e zotit Berisha, ndërsa  burime brenda partisë kanë thënë se kryedemokrati kishte folur për të tjera prova të paraqitura kundër ish-kryeministrit dhe familjes së tij. Sipas Bashës ky ishte vendimi më i mirë ndaj zotit Berisha, i cili megjithatë u betua si deputet dhe e cilësoi nul vendimin e Bashës, duke pretenduar të jetë ende pjesë e grupit parlamentar të PD-së.

Figura e Hajdarit në këtë 23 vjetor të vdekjes së tij, ka reaguar edhe e bija – ish deputete e Kuvendit, e cila doli kundër vendimit të Bashës për të djegur mandatet dhe ishte një nga zërat kryesorë të Opozitës së Re dhe pjesë e Këshillit katërpalësh Politik për Reformën Zgjedhore.

“Kur i sheh sot të ankohen për mungesë demokracie brenda partive të tyre, të vjen të qeshësh e të qash njëkohësisht. Të qeshësh sepse janë viktima perfekte të krijesave të tyre dhe të qash për nivelin e hipokrizisë që shfaqin”, u shpreh Rudina Hajdari, duke ironizuar si liderin aktual Basha ashtu edhe ish-kryetarin Berisha.

“Aq keq është dëmtuar shteti shqiptar nga ata që e drejtuan këto 30 vite, aq shumë i kanë shtrembëruar mekanizmat demokratikë, aq shumë i kanë vendosur në kontroll të gjitha burimet e vendit, saqë shoqëria e ka të pamundur sot të vetë korrigjohet dhe u duhet patjetër ndihma e aleatëve si SHBA të cilëve u duhet të përdorin peshën e rëndë të reputacionit dhe mekanizmat e tyre penalizuese në betejën për të ndërtuar një shtet të vërtetë shqiptar”,  vijonte Hajdari, duke iu referuar ngjarjeve të fundit, ku Basha zgjodhi të theksojë aleancën e padiskutueshme të PD me Shtetet e Bashkuara të Amerikës dhe t’i përgjigjej thirrjeve të ambasadores Kim për të rishikuar listat e deputetëve dhe për të mos lejuar personat “non grata” brenda Kuvendit.

“Drejtuesit venë e vijnë, sistemi dhe institucionet mbeten dhe i rezistojnë kohës. Nëse Azemi do të ishte sot mes nesh, do të luftonte pikërisht për këtë. Në fakt energjia dhe kuraja e tij me siguri do ta kishin ndryshuar rrjedhën e historisë”, e ka përfunduar ajo mesazhin.

Mesazhe për figurën e Hajdarit ka përcjellë edhe presidenti Ilir Meta, duke kujtuar edhe njëherë thirrjet e studentëve të Dhjetorit ’90, për një Shqipëri si e gjithë Europa!

Prej shtatorit të 1998-s,  demorkatët kanë kryer çdo vit homazhe në bustin e Hajdarit dhe kaë përkujtuar figurën e tij. Madje pak pas vrasjes,  me arkivolin e tij demokratët protestuan përpara godinës së Kryeministrisë. Por ky vit i gjen demokratët përballë një situate jo të zakontë, ku lideri aktual – shpesh i akuzuar si i vendosur me vullnet të Berishës në krye të PD-së, mori vendimin për ta përjashtuar ish-liderin dhe një prej themeluesve të partisë nga Grupi Parlamentar. Thirrjet për bashkim të demokratëve u dëgjuan nga dy kampe dhe për drejtime të ndryshme; një për të luftuar të ashtuquajturën betejë që Basha e ka lajmëruar prej fund-prillit dhe një tjetër për të rikthyer PD-në e epokës para-Basha.

Ish-deputetja kujton të atin: Do tw kishte ndwrruar rrjedhwn e historisë!

Ish-deputetja Rudina Hajdari i ka dedikuar Azemit një shkrim ku e cilëson babain e saj një njeri luftarak, idealist dhe ëndërrimtar, veti që sipas saj nuk hasen në skenën politike shqiptare.

Sipas Hajdarit, nëse babai i saj do të ishte gjallë, ai do të kishte ndryshuar rrjedhën e historisë me energjinë që kishte.

SHKRIMI I PLOTË

Kur Azem Hajdari doli nga godina e PD mbrëmjen e 12 shtatorit 1998, ai nuk e dinte se nuk do të kthehej më. As nuk e dinte se do të linte mbas një boshllëk në zemrat tona, të familjarëve të tij por edhe në të gjithë historinë që pasoi më pas vendin.

Babi nuk ishte një njeri normal. Përgjatë rrugëtimit tim politik në Shqipëri e kam ndier prezencën e tij të fortë edhe mbas 23 vitesh. Në fshatra e mbanin mend si deputetin e tyre të parë dhe të fundit, njeriu i vetëm që ishte kujdesur të sillte ujë dhe infrastrukturë aty ku qeveria kishte shekuj që i kishte harruar. Në qytet e mbajnë mend si njeriun e njerëzve të thjeshtë që luftonte me burokracinë dhe padrejtësinë.

Azemi ishte luftarak, idealist, guximtar dhe ëndërrimtar. Veti këto të cilat nuk i kemi parë më në skenën politike shqiptare. Ëndrra e tij ishte një Shqipëri e lirë dhe demokratike, ku njerëzit e ndërtojnë jetën e tyre me besim e pa frikë për të ardhmen e fëmijëve. Fatkeqësisht kjo ëndërr ende nuk është bërë realitet dhe sot dua të flas pak mbi arsyet përse kjo ka ndodhur.

Ata që e zvarritën vendin në rrugëtimin e tranzicionit pafund politik, me qëllim i sabotuan institucionet dhe mekanizmat demokratikë me synimin për ta vendosur shtetin në shërbim të interesave të tyre personale e familjare. Kështu për 30 vite, shteti, buxheti, pasuritë natyrore etj nuk i shërbyen mirëqenies së përgjithshme por interesave të vetëm një grupimi i cili është pasuruar përtej çdo imagjinate, teksa shqiptarët ose janë varfëruar ose kanë emigruar ose ëndërrojnë të emigrojnë teksa ndiejnë se s’kanë të ardhme në këtë vend.

Kur i sheh sot të ankohen për mungesë demokracie brenda partive të tyre, të vjen të qeshësh e të qash njëkohësisht. Të qeshësh sepse janë viktima perfekte të krijesave të tyre dhe të qash për nivelin e hipokrizisë që shfaqin. Aq keq është dëmtuar shteti shqiptar nga ata që e drejtuan këto 30 vite, aq shumë i kanë shtrembëruar mekanizmat demokratikë, aq shumë i kanë vendosur në kontroll të gjitha burimet e vendit, saqë shoqëria e ka të pamundur sot të vetëkorrigjohet dhe u duhet patjetër ndihma e aleatëve si SHBA të cilëve u duhet të përdorin peshën e rëndë të reputacionit dhe mekanizmat e tyre penalizuese në betejën për të ndërtuar një shtet të vërtetë shqiptar.

Nëse partitë politike do të ishin ndërtuar me parimin demokratik dhe do të funksiononin si të tilla, debati në Shqipëri do të ishte shumë i shëndetshëm. Sot nuk do të flisnim për individë por për çështje. Nuk do të diskutonim për fatin e familjeve politike që kanë grabitur vendin për 30 vite por për fatin e familjeve të thjeshta shqiptare.

Përshembull sot në vend që të debatonim për nivelin e ushqimit që do i privohet një familjeje politike për shkak të një vendimi që SHBA ka marrë, debati duhet të shkonte drejt dëmit që i është bërë qindra mijëra familjeve në nevojë nga rritja e papritur dhe arbitrare e çmimit të bukës. Kryeministri në vend që të mblidhte letrat e teatrit politik në parlament, duhet të mblidhte gjithë bizneset e miellit dhe të merrte masa që kjo të mos ndodhte ose të krijonte kushte rimburimi për ata që nuk e përballojnë dot.

E pra, si ky rast ka me mijëra. Në fakt 30 vite i kemi shpenzuar duke mos debatuar për vendin, për fëmijët, për rininë, për familjet shqiptare por vetëm e vetëm për fatin e 3-4 familjeve politike të cilat ia kanë dalë të ngrenë një sistem të mbyllur i cili nuk ka shumë diferencë nga sistemi monist për nga mënyra se si funksionin.

Nëse atëherë të internonin apo burgosnin kur nuk mendoje në linjën e partisë, sot të përjashtojnë dhe lincojnë publikisht. Nëse atëherë të pushkatonin fizikisht, sot të pushkatojnë politikisht dhe ekonomikisht. Shqipëria do të dalë nga kjo situatë kur shumica e shqiptarëve të kuptojnë se mirëqënia dhe zhvillimi nuk vijnë nga lideri i fortë por nga sistemi i drejtë dhe institucionet e forta të cilat garantojnë demokracinë, lirinë dhe barazinë. Kur të fillojnë të mos mbështesin më parti e individë sepse prej tyre varet ushqimi i ditës por të mbështesin vizionin për ndërtimin e një sistemi i cili tu garantojë mirëqënie gjithë jetën. Kur të vendosin të mos luftojnë më thjesht për mbijetesë por për të ndërtuar një të ardhme të sigurtë.

Drejtuesit venë e vijnë, sistemi dhe institucionet mbeten dhe i rezistojnë kohës. Nëse Azemi do të ishte sot mes nesh, do të luftonte pikërisht për këtë. Në fakt energjia dhe kurajo e tij me siguri do ta kishin ndryshuar rrjedhën e historisë.

Meta: Guximi i tij duhet të frymëzojë përpjekjet tona për një Shqipëri si gjithë Europa!

Presidenti Ilir Meta ka kujtuar ish-deputetin Azem Hajdari, ku sot mbushen sot 23 vite nga vrasja e tij.

MESAZHI I METËS

Nderime, respekt dhe mirënjohje ndaj veprës së përjetshme të Azem Hajdarit, udhëheqësit të ‘Lëvizjes Studentore’, që solli pluralizmin politik dhe demokracinë.

Energjia dhe guximi i Tij duhet të frymëzojnë përpjekjet tona për një Shqipëri si gjithë Europa! /Gazeta Liberale