Universiteti Europian i Tiranës mirëpriti edicionin e tretë të Festivalit të Filmit dhe Fotografisë, Travel Fest Albania. Gjatë tre ditëve, në ambientet e universitetit u shfaqën 30 filma dhe u ekspozuan 20 fotografi, ndërsa finalizimi erdhi me dhënien e 19 çmimeve në kategori të ndryshme.
Një histori universale për lidhjen e thellë mes njerëzimit dhe natyrës, e shpalosur në 65 minuta pamjesh impresionuese, nën kolonën zanore të Orkestrës Kombëtare të Skocisë. Një udhëtim imagjinar që të kthen në origjinën e largët të universit: nga formimi i galaktikave, lindja e jetës, “ndërhyrja" e njeriut e deri te krizat ekologjike të ditëve të sotme, duke treguar ndërvarësinë e gjithçkaje në natyrë.
Me regjisor dhe kompozitor Jim Sutherland dhe skenariste fituesen e disa çmimeve Bafta, Morag McKinnon nga Mbretëria e Bashkuara, filmi “Kur peshqit fillojnë të zvarriten” u shpall Filmi më i Mirë i Travel Fest.
Ky Festival i Filmit dhe Fotografisë që zhvillohet prej tre vitesh në vendin tonë, mbledh çdo vit në konkurrim prodhime kinematografike kombëtare dhe ndërkombëtare. Me synimin për të qenë një hapësirë e re për të gjithë kineastët dhe dashamirësit e natyrës, festivali tërheq fotografi, filma, video të kategorive të ndryshme: udhëtim, natyrë, ushqim dhe pije, destinacione, ekspozita, aventura etj., të cilët në fund vlerësohen me çmime nga juria.
Ky edicion i tretë u mbështet nga Universiteti Europian të Tiranës dhe përgjatë tre ditëve u shfaqën në ambientet e tij 30 filma të përzgjedhur si dhe u ekspozuan 20 fotografi. Çmimet u prezantuan nga dekania e Fakultetit të Shkencave Humane, Edukimit dhe Arteve Liberale, Prof. Asoc. Dr. Belina Budini dhe drejtori i Travel Fest, Pandeli Çeço.
Për producentët britanikë, fitues të Filmit më të Mirë, nuk ishte hera e parë që vinin në Shqipëri, pasi më herët kanë eksploruar bukuritë dhe natyrën shqiptare, teksa u shprehën të nderuar nga vlerësimi që morën.
“Faleminderit shumë për këtë çmim prestigjioz, me një rëndësi të madhe për ne dhe për të gjithë stafin realizues. Kishim kënaqësinë të vizitonim vendin tuaj të mrekullueshëm në fillim të këtij viti dhe u mahnitëm nga bukuria dhe mikpritja e tij. Shqipëria na ka lënë një përshtypje të pashlyeshme, dhe mezi presim të kthehemi sa më shpejt të mundemi. Ky çmim jo vetëm që vlerëson punën tonë, por do të na ndihmojë shumë edhe në promovimin e filmit dhe përhapjen e mesazhit të tij të rëndësishëm tek një audiencë më e gjerë”, u shprehën ata.
Dekania Budini ndau çmimin për kategorinë "Mjedisi & Ekologjia" për regjisoren italiane Raffaella Lorusso, me filmin e saj Neverland (L'Isola che non c'è). Filmi u vlerësua për përshkrimin e tij të fuqishëm të çështjeve mjedisore.
Në kategorinë "Shqip", çmimi iu dha regjisorit shqiptar Adrian Guri për filmin “Shpëtimi i Lumit Vjosa – Përtej Historisë” nga drejtori i festivalit, Pandeli Çeço. Filmi solli mesazhin e rëndësishëm për ruajtjen e një prej thesareve natyrore më të çmuara të Shqipërisë.
Përveç 12 çmimeve që u dhanë për filmat në kategori të ndryshme, u nderuan edhe pesë autorë për kontributet e tyre në montazh, skenar, kinematografi, sound design dhe regji.
Po ashtu, u vlerësuan me çmime shtatë fotografë, për punën e jashtëzakonshme në rrokjen e temave të larmishme, si: tradita, trashëgimia, shpirti njerëzor, ngjarjet kulturore dhe natyra e egër.
Edicioni i tretë i Travel Fest Albania ishte një festë e krijimtarisë, njëkohësisht një thirrje për ndërgjegjësimin rreth problematikave mjedisore, duke ofruar një platformë për regjisorët dhe fotografët që të eksplorojnë trashëgiminë kulturore dhe natyrore përmes shfaqjes së fuqishme vizuale.
