Financimi synon të nxisë bashkëpunimin e vendeve anëtare të BE-së si dhe të atyre kandidate ku bën pjesë Shqipëria, në arsimin e lartë
Komisioni Europian shpalli në fillim të këtij muaji rezultatet e thirrjes “2024 Erasmus+”, mbi nismën e Universiteteve Evropiane, e cila ofron mbështetje për aleancat e institucioneve të arsimit të lartë. 14 aleanca të reja të Universiteteve Europiane do ti bashkohen 50 aleancave të përzgjedhura më parë dhe do të marrin deri në 14.4 milionë euro secila për një periudhë katër vjeçare.
Këto 64 aleanca të Universiteteve Evropiane përfshijnë më shumë se 560 institucione të arsimit të lartë të të gjitha llojeve, në të gjitha rajonet e Evropës. Rezultatet shënojnë një moment historik të rëndësishëm, mbi arritjen e strategjisë evropiane për qëllimin e universiteteve për të patur të paktën 60 aleanca të universiteteve evropiane me më shumë se 500 universitete të përfshira deri në mesin e vitit 2024.
Aleancat e Universiteteve Evropiane bashkojnë një brez të ri evropianësh dhe i lejojnë ata të studiojnë dhe të punojnë në vende të ndryshme të kontinentit, në gjuhë të ndryshme dhe në sektorë dhe disiplina akademike. Studentët mund të marrin një diplomë të nivelit të lartë duke kombinuar studimet në disa vende evropiane dhe duke kontribuar në atraktivitetin dhe konkurrencën ndërkombëtare të arsimit të lartë në Evropë. Këto aleanca sjellin gjithashtu risi në rajonet e Evropës duke i lejuar studentët të punojnë së bashku me akademikë, studiues, ndërmarrje, qytete, autoritetet dhe organizatat e shoqërisë civile.
64 aleancat përfshijnë 35 vende, përfshirë të gjitha shtetet anëtare të BE-së, si dhe Shqipërinë, Bosnjë dhe Hercegovinën, Islandën, Malin e Zi, Republikën e Maqedonisë së Veriut, Norvegjinë, Serbinë dhe Turqinë. Ato janë të ankoruara fort në komunitetet dhe rrjetet e inovacionit, duke bashkuar pothuajse 2200 partnerë të asociuar, duke filluar nga organizatat joqeveritare deri te ndërmarrjet, qytetet, autoritetet lokale dhe rajonale dhe institucionet e arsimit të lartë nga vendet e Procesit të Bolonjës . 35 institucione të arsimit të lartë nga Ukraina janë partnerë shoqërues.
Thirrja për propozime Erasmus+ 2024 mbështet gjithashtu ngritjen e një Komuniteti të Praktikës për Universitetet Evropiane, duke përforcuar të mësuarit nga kolegët midis aleancave dhe duke nxitur shpërndarjen e rezultateve dhe modeleve të ripërdorshme brenda sektorit më të gjerë të arsimit të lartë.
14 aleancat e reja të Universiteteve Europiane dhe Komuniteti i Praktikës për Universitetet Europiane do të nisin aktivitetet e tyre në vjeshtë të këtij viti. Komisioni Europian do të vazhdojë të mbështesë aleancat e Universiteteve Evropiane dhe çdo lloj partneriteti tjetër midis institucioneve të arsimit të lartë për të ofruar programe të përbashkëta të diplomave më lehtë, siç përshkruhet edhe në planin për një diplomë evropiane të paraqitur në mars 2024.
Komisioni propozoi nismën e Universiteteve Europiane për liderët e BE-së përpara Samitit Social të Goteborgut në nëntor 2017 , si pjesë e një vizioni të përgjithshëm për krijimin e një zone evropiane të arsimit të lartë deri në vitin 2025. E paraqitur në vitin 2022, strategjia europiane për universitetet përcakton ambicien për të mbështetur të paktën 60 aleanca të Universiteteve Evropiane që përfshijnë më shumë se 500 institucione të arsimit të lartë deri në mesin e vitit 2024. Për këtë, një rekord prej 1.1 miliardë eurosh nën Erasmus+ është parashikuar gjatë periudhës të programimit 2021-2027. Mbështetja për dimensionin kërkimor të aleancave të Universiteteve Evropiane mund të kërkohet nën iniciativën European Excellence nën “Horizon Europe”.
Thirrja e Universiteteve Evropiane Erasmus + 2024 u strukturua rreth dy fushave. Ajo ofron mbështetje për krijimin e aleancave të reja të Universiteteve Evropiane në të gjithë Evropën, duke mbledhur institucione të ndryshme të arsimit të lartë rreth vizioneve të përbashkëta strategjike, si dhe krijimin e një Komuniteti të Praktikës për aleancat e Universiteteve Evropiane.
