Kryeministrja në largim e Zelandës së Re, Jacinda Ardern, nuk mundi t'i mbajë lotët në një tubim të politikanëve dhe pleqve maori në qytetin Ratana sot, 24 orë para se ajo t'i dorëzojë frenat e pushtetit pasuesit dhe liderit të ri laburist, Chris Hipkins.
E veshur me një veshje tradicionale maori të quajtur korowai, një Ardern e emocionuar tha se ishte një "privilegj i madh" t'i shërbente vendit të saj dhe ishte ende shpejtë për të lavdëruar pasardhësin e saj. Në fjalimin e saj, të cilin ajo nuk e kishte planifikuar siç theksoi, turma i bëri një pritje veçanërisht të ngrohtë.
Megjithatë, ajo ka nxituar të hedhë poshtë pretendimet se kërcënimet që ka marrë shpesh muajt e fundit kanë qenë arsyeja e largimit të saj nga pushteti, siç raporton gazeta britanike “Guardian”.
“Jam gati të jem motër dhe nënë”, tha ajo, ndërsa duke iu referuar pasuesit të saj, Chris Hipkins, foli për një politikan “me këmbë në tokë dhe praktik”.
Ardern gjithashtu falënderoi bashkëqytetarët e saj për të cilët tha se treguan ndjeshmërinë dhe dashamirësinë e saj.
Politikanja 42-vjeçare e qendrës së majtë, një model për shumë drejtues në mbarë botën, tërhoqi vëmendjen globale kur mori pjesë në një asamble të Kombeve të Bashkuara me foshnjën e saj dhe veshi një hixhab pas një masakre kundër myslimanëve.
Edhe pse ka qenë shënjestër e urrejtjes dhe abuzimit online nga ekstremistët e djathtë në rrjetet sociale, ajo theksoi se po largohet nga detyra me dashuri në zemër.
“Dua që të dini se unë largohem me dashuri më të madhe për ‘Aotearoa’ – siç quhet Zelanda e Re në gjuhën maori – dhe njerëzit e saj”. "Unë nuk mendoja se kjo ishte e mundur," tha kryeministrja në largim e Zelandës së Re.
“Këtë punë nuk e kam bërë kurrë vetëm. E bëra me këta njerëz të mrekullueshëm që po bëjnë detyrën e tyre për Zelandën e Re. Dhe unë largohem duke e ditur se ju jeni në duart më të mira”.
Ardern planifikon të qëndrojë deputete deri në prill dhe ka thënë se nuk do të kandidojë në zgjedhjet e tetorit. Ajo gjithashtu këmbënguli se është gati për rolin e saj të ri, relativisht të paparë.
“Jam gati të jem shumë gjëra. Jam gati të bëhem deputete e zakonshme. Jam gati të jem motër dhe nënë”, është shprehur. “Faleminderit nga thellësia e zemrës sime për privilegjin më të madh të jetës sime”, i tha Ardern turmës.
Ardern dhe Hipkins, së bashku me politikanë të opozitës, vizituan qytetin Ratana, ku mbahet një festë javore e lindjes së profetit maori Tahupōtiki Wiremu Rātana, raporton Daily Mail./Liberale.al
