Ish-shefi i krimeve në komisariatin nr.3 në Tiranë, Erjon Dani, është vetëdorëzuar sot në policinë e Himarës, pasi mësoi nga mediat se ndaj tij ishte lëshuar një urdhër arresti nga SPAK.
Dani akuzohet për veprat penale "ndikim i paligjshëm" dhe "shpërdorim detyre", që dyshohet se i ka kryer gjatë kohës kur ishte pjesë e strukturave të policisë.
SPAK zhvilloi sot një operacion të madh kundër një grupi kriminal, i cili merrej me trafikun ndërkombëtar të drogës, nga Amerika Latine drejt Europës. Si pjesë e këtij aksioni, janë arrestuar 8 persona, ndër ta edhe Dani, ndërsa 5 të tjerë janë ende në kërkim.
Hetimi është bërë i mundur falë zbërthimit të komunikimeve të koduara në aplikacionin SKYECC, të cilin anëtarët e grupit e përdornin për të komunikuar fshehurazi.
