Orientimi i karrierës është shumë i rëndësishëm për punësimin në të ardhmen, por a duhet ta përcaktojnë prindërit apo të vetëvendosin për profesionin.

A duhet të jetë e fortë lidhja mes gjinisë dhe profesionit, pra një vajzë të jetë me patjetër edukatore, mësuese infermiere, apo ajo mund të ushtrojë shumë mirë profesionin e inxhinieres së ndërtimit apo polices?

Këshillimi i karrierës nuk duhet të mbetet më traditë, shprehet pedagogia Helena Halilaj.

“Këshillimi i karrierës duhet të shkëputet njëherë e përgjithmonë që duhet të jemi të ngjashëm me profesionin e prindërve, se prindërit kanë krijuar traditën jo vetëm të profesionit por edhe të jetëgjatësisë në profesion. Pra ti do zgjedhësh një profesion me të cilin do pensionohesh. Prindërit nuk mund të të japin ty profesionin e tyre dhe të zgjedhin në kohë të ndryshme të njëjtin profesion që ata kanë zgjedhur në vitet 90’. Nëse një student ka prirje të shkencave humane nuk mundet të zgjedhë arkitekturën, ekonomikun apo një profil që nuk e njeh dhe nuk e dëshiron. Ka zgjedhje të gabuara në historinë studentëve që kanë dëgjuar prindërit dhe pas 3-5 vitesh studim kanë zgjedhur profilin që kanë menduar se është profili profesional i jetës së tyre“, shpjegon ajo.

Po gjinia, a po ndikon më në zgjedhjen e profesionit?

“Nuk duhet të ndikojmë sidomos te vajzat në zgjedhjen e profesionit.  Ne sot kemi kuptuar që vajzat janë po kaq të zonjat në profile që deri dje kanë pasur impaktin e profileve të vështira. Për shembull, mund të përmendim inxhinierinë e ndërtimit, minierat, mekanikën, sportet, policia. Vajzat kanë mundësi ti zgjedhin këto profile dhe janë po kaq të afta dhe ecin paralelisht edhe me djemtë“, thotë Halilaj.

/T.Ch