Një 21-vjeçar nga Saranda, Orgest Lena i proceduar më parë për dhënie ndihmë për kalim të paligjshëm të klandestinëve Sirianë, është arrestuar nga policia, pasi dyshohet se i ka shitur drogë një vajze minorene.
Ndalimi i Lenës, është kryer me vullnetin e këtij të fundit, pasi ai së bashku me avokatin mbrojtës mësohet se është dorëzuar në ambientet e komisariatit të Sarandës.
I riu një javë më parë ai u shpall në kërkim për akuzën e “Prodhimit dhe shitjes së lëndëve narkotike”, pasi i kishte shitur drogë një vajze të mitur 15-vjeçare
Vajza e mitur raportohet se është mbesa e një ish-kryetari bashkie në Sarandë, e cila për shkak të konsumimit të drogës, ka pësuar komplikacione shëndetësore duke u shtruar në spitalin Rajonal të Sarandës.
Gjatë marjes në pyetje, e mitura ka treguar emrin e personit që i kishte shitur drogën, ndaj prej 18 Majit 2025, policia shpalli në kërkim shtetasin Orgest Lena.
Ky i fundit 1 javë nga shpallja në kërkim, është vetëdorëzuar sot në polici, ku mësohet se ka dhënë shpjegime për rastin e lartëpërmendur.
"Specialistët për Hetimin e Krimeve në Komisariatin e Policisë Sarandë referuan materialet në Prokurori dhe shpallën në kërkim shtetasin O. L., 22 vjeç, banues në Sarandë, pasi dyshohet se më datë 16.05.2025, i ka shitur një sasi lëndë narkotike kokainë një shtetaseje të mitur 15 vjeçare, e cila si pasojë e konsumimit të lëndës narkotike ka marrë ndihmë mjekësore në spital."- njoftoi policia më 19 maj.
