Kryetari i Partisë Demokratike, Sali Berisha njoftoi dy ditë më parë se në kundërshtim të rezultatit të zgjedhjeve që i konsideroi më të grabiturat në historinë shqiptare, më datë 16 do të mbahej një protestë në orën 17:00 tek Bulevardi Zogu i Parë.
Ndërkohë, sot Policia e Tiranës ka refuzuar kërkesën e PD për të zhvilluar protestë ditën e Samitit europian në Tiranë, më 16 Maj.
Për shkaqe sigurie, Policia e kryeqytetit nuk ka dhënë leje për zhvillimin e protestës. Ky vendim është marrë për shkak se protesta e thirrur nga Berisha pas humbjes së zgjedhje parlamentare, është afër perimetrit të sigurisë së Samitit.
“Libri i zi i këtyre zgjedhjeve shkruhet me datën 16 në ora 17:00 në Bulevard për të sensibilizuar opinionin publik botëror mbi krimet monstruoze të përbindëshit elektoral Edi Rama, që nuk respekton asnjë rregull, asnjë ligj kombëtar dhe ndërkombëtar për zgjedhjet”, deklaroi dje Berisha.
