Aktualitet

SHIFRA E DITËS: Italia indekson dhe rrit pensionet (700 euro minimumi), Shqipëria e politikave sociale dyfishon pagat e ministrave  

Shkruar nga Liberale
SHIFRA E DITËS: Italia indekson dhe rrit pensionet (700 euro minimumi),

Aranit Muraçi

Imagjinoni një të moshuar në vendin tonë që mbahet me pension të pjesshëm, ose për një arsye apo tjetër nuk ka pension fare. Dhe është i sëmurë. I duhet të blejë ilaçe. Me rritjen e çmimeve kostoja e jetesës është bërë gjatë vitit të fundit edhe më e papërballueshme. Jo vetëm në një vend si Shqipëria, që për shkak edhe të së kaluarës mbetet një ndër vendet më të varfra në Europë. Por edhe në vendet e zhvilluara. Kështu, masat e qeverive në mbarë kontinentin, të majta ose të djathta qofshin ato, nisën me kompensimin e të ardhurave për qytetarët, duke pasur në fokus shtresat më në nevojë.

Ndryshe nga paradoksi dhe modeli që ndoqi Shqipëria, e cila e nisi reformën për t’iu kundërpërgjigjur krizës me rritjen e pagave të Administratës Publike, dhe me dyfishimin e pagave për zyrtarët e lartë, përfshirë deputetë dhe ministra, vendet e tjera edhe pse të djathta janë të fokusuara për t’u ardhur në ndihmë shtresave më në nevojë dhe më të goditurat nga kriza. Rritja e pagës minimale dhe premtimi për rritjen e pagës mesatare, si nisma inkurajuese të qeverisë së majtë në Shqipëri janë gjithashtu të pjesshme për t’iu kundërpërgjigjur krizës, sepse ato mund të mos zbatohet nga sektori privat.

Fokusi i të gjitha vendeve të tjera te shtresat më të prekura nga kriza është i thjeshtë sepse, vetëm në këtë mënyrë, mbrohet fuqia blerëse dhe nxitet konsumi, çka i jep hov ekonomisë për të shmangur recesionin.

Edhe Italia e Giorgia Meloni, e cila drejton një nga qeveritë më radikale dhe të djathta në Europë, nuk mund të vepronte ndryshe në këtë periudhë krize veçse të ndiqte alternativën e vetme ekonomike, edhe pse një politikë e tillë konsiderohet e majtë dhe sociale, për t’iu ardhur ndihmë shtresave më në nevojë.

Ata që marrin pension minimal do të marrin pas shtatë muajsh rritjet e përcaktuara nga qeveria me ligjin e ri të Buxhetit. Aktualisht po indekoshen pensionet me çmimet e rrituta gjatë vitit dhe duke nisur nga viti 2024, përfitimet minimale të pensionistëve mbi 75-vjeç do të shkojnë nga 600 në 700 euro në muaj. Qeveria e Melonit vendosi gjithashtu normën e rivlerësimit të pensioneve minimale 6.4% në 2023 për pensionistët mbi 75 vjeç dhe 1.5% për pensionistët e tjerë.

Një rritje që i shtohet indeksimit që ishte vendosur më herët, me qëllim rikuperimin e inflacionit. Për rrjedhojë, në vitin 2023 shtesat minimale për ata mbi pragun e moshës do të rriten nga 563,74 në 599,82 euro dhe për të tjerët në 572,20. Për ata që e gjejnë veten nën shumën minimale, duke mos pasur të drejtë integrimi, rritja e përqindjes do të zbatohet për shumat që duhen paguar.

Të gjitha shtesat e tjera prej rreth 400 milionë eurosh në total, janë rregulluar me ligj duke filluar nga 1 janari. Që do të thotë se në muajin korrik pensionistët në fjalë do të mbledhin përveç shumës së shtuar edhe 6 muaj detyrime të prapambetura për muajt janar-qershor. Por për vitin 2024, qeveria po mendon, siç u përmend, për të hedhur një hap të mëtejshëm përpara, me qëllim mbështetjen e pensionistëve.

Arsyet janë edhe politike. Gjatë javës, Parlamenti italian do të votojë një mocion që detyron ekzekutivin të çojë pensionet minimale në një mijë euro deri në fund të mandatit, objektiv i përcaktuar të arrihet deri në vitin 2027. Problemi, megjithatë, është se shumë miliarda do të nevojiteshin për të siguruar këtë përmirësim për të gjithë shtresat e pensionistëve. Ndoshta edhe njëzet sipas disa simulimeve.

Shumë para për momentin dhe ndoshta edhe në të ardhmen. Për të mundësuar këtë, qeveria po punon për një plan ambicioz që parashikon sinjalin e parë, në vitin 2024. Kjo do të thotë se rritja, nga 600 në 700 euro, është e rezervuar dhe e garantuar vetëm për ata të cilët marrin pension minimal dhe që i kanë kaluar 75 vjeç. Një lëvizje e tillë do të kushtonte rreth një miliard euro.

Ka edhe një variabël tjetër që do të hyjë në lojë; nga janari 2024, për shumicën e pensionistëve do të shkaktohet një rregullim i ri i inflacionit, i cili (duke përfshirë rikuperimin e asaj që nuk u njoh në 2023) duhet të kalojë 6 për qind. Pragu minimal i trajtimit në këtë mënyrë automatikisht do të afrohej në 600 euro.

Mbetet për t'u parë dhe kjo varet nga mundësitë dhe zhvillimi ekonomik i Italisë, politikat fiskale etj, nëse ndërhyrja do të financohet të paktën pjesërisht edhe për vitet në vijim.

/Liberale.al/

 

Liberale Newsroom

Poll
SHQIPENGLISH