Kryesore

Qershori i nxehtë i Metës dhe Bashës

               Publikuar në : 10:15 - 07/06/21 liberale

Të mërkurën, në 9 qershor në Kuvend do të shqyrtohet raporti i Komisionit Hetimor për shkarkimin e Presidentit të Republikës me argumentimin se ka shkelur rëndë Kushtetutën. Ndërsa të dielën tjetër PD do të zgjedhë kryetarin e ri pas humbjes së 25 prillit dhe trazimit të ujërave nga vendimi i DASH për ish kryeministrin Berisha

Muaji qershor nuk ka rritur vetëm temperaturën e ajrit, kjo javë pritet të jetë mjaft e nxehtë edhe për politikën shqiptare. Të mërkurën, në 9 qershor është paralajmëruar seanca ku do të shqyrtohet raporti i Komisionit Hetimor për shkarkimin e Presidentit të Republikës me argumentimin se ka shkelur rëndë Kushtetutën. Për të larguar nga detyra Kreun e Shtetit, parlamenti duhet të votojë me 94 vota pro, por vendimin e fundit e jep Gjykata Kushtetuese që do vulosë shkarkimin ose jo të presidentit.

Mazhoranca socialiste si iniciuese e kësaj nisme ka preferuar të heshtë. Përtej argumenteve në seancë pritja me heshtje duket se do zgjasë përtej 9 qershorit.

“Nuk do të bëj asnjë koment lidhur më këtë çështje deri në momentin që do të shprehet Gjykata Kushtetuese sepse është një institucion i pavarur”, tha më herët Taulant Balla.

Presidenti është shfaqur i pa shqetësuar për nismën për shkarkimin e tij. Pasi injoroi Komisionin Hetimor, duke e cilësuar si jo legjim, Ilir Meta duket i bindur që do qëndrojë në zyrën e presidentit deri në 22 korrikun e viti që vjen, kur dhe i përfundon mandati kushtetues në krye të shtetit.

“Tema e shkarkimit është nul aq më tepër pas 25 prillit dhe ku u tregua qartë se Kuvendi i 2 viteve të fundit ishte një kuvend pa opozitë  dhe sot është për fat të keq edhe 3 herë më antikushtetues”, do të shprehej disa ditë më parë presidenti.

Komisioni i mbylli javën që shkoi hetimet e nisura nga kërkesa e një grupi deputetësh për shkarkimin e Metës me pretendimin e shkeljes së rëndë të Kushtetutës.

Pretendime të ngritura edhe më herët ndaj presidentit Meta, por që kësaj here patën në fokus mesazhet dhe deklaratat e tij para, gjatë dhe pas fushatës elektorale.

Ashtu siç edhe i pat lajmëruar më herët, përmes një letre të gjatë e shteruese drejtuar kreut të Kuvendit, edhe dje presidenca është përgjigjur përmes një shkrese për mospjesëmarrjen e tij në mbledhjen e Komisionit Hetimor.

“Presidenti i Republikës nuk mund të diskutojë, por dhe as të dëgjohet nga një strukturë e ngritur në Kuvend, që nuk ka legjitimitet dhe nuk duhet të ekzistojë sipas Kushtetutës dhe ligjit”, thuhej në shkresën që drejtori i kabinetit të presidentit,  ia adresonte Sekretarit të Përgjithshëm të Kuvendit.

Presidenti më herët argumentoi se në katërmujorin e fundit të legjislaturës aktuale, Kuvendi nuk mund të ndërmerrte nisma me natyrë hetimore, si ajo për shkarkimin e tij dhe madje as një seancë si ajo që miratoi ngritjen e Komisionit Hetimor. Meta sqaronte se ky afat niste pas datës 10 maj, datë që presidenti shprehu gatishmërinë të merrte pjesë në dëgjesë e që përkonte me Ditën Kombëtare të Drejtësisë. Komisioni i Ligjeve e kërkoi më herët, duke mos i lënë kohë të njihej me çështjen siç do të thoshte Meta dhe sipas tij miratimi brenda 24 orëve ishte në shkelje të ligjit. Ndërsa Meta i bënte thirrje kreut të Kuvendit, Ruçi, për të mos vijuar me Komisionin që ishte sipas tij jolegjitim dhe jokushtetues, kreu i Komisionit Hetimor deklaronte se nisma ishte legjitime dhe se mungesa e presidentit ishte ajo që ngjallte dyshime.

Komisioni i kërkoi gjithashtu presidentit vënien në dispozicion të materialeve nga veprimtaritë e tij gjatë periudhës mars-prill, e cila do të merrej nën hetim për pretendimet e deputetëve se presidenti kishte shkelur Kushtetutën dhe kishte nxitur ndasi dhe vetëgjyqësi tek qytetarët.

“Ndërkohë që Kuvendi i Shqipërisë, vijon me përgatitjen e dosjeve fiktive, përmes njoftimeve të parapërgatitura, me qëllim që të duket sikur po zhvillon një proces që respekton procedurën”, thuhet në shkresën e fundit të presidencës, ku bëhet e qartë se presidenti nuk u ka kthyer përgjigje, as në datën 18 maj.

“Gjithsesi, ju sjellim në vëmendje se, Presidenti i Republikës ka bërë të qartë qëndrimin e tij se, nuk bëhet palë me askënd në shkelje të Kushtetutës së Republikës së Shqipërisë”, vijon shkresa që u  bën sërish thirrje për reflektim deputetëve të Kuvendit.

Meta do të theksonte edhe disa ditë më parë se nëse ky proces nuk do të ndalej, edhe presidenti do të vijonte punën, duke shpërfillur komisionin sipas tij jokushtetues dhe të ngritur jashtë afateve.

 Zgjedhjet në PD

Tre ditë pas seancës për shkarkimin e Ilir Metës, në datën 12 qershor Partia Socialiste, në 30-vjetorin e saj mbledh Kongresin ku do të bëhet një analizë e zgjedhjeve të 25 prillit. Takimi që u pri nga Asambleja, ndërsa priten ndryshime në strukturat vendore, ende nuk ka një sinjal se kur do të rinovohet Kryesia e forcës që u konfirmua në pushtet për një mandat të tretë.

Në kahun tjetër, në Selinë Blu, analizën e humbjes se 25 prillit e kanë lënë pas zgjedhjeve për kryetarin. Me 13 qershor anëtarësia iu drejtohet kutive të votimit për të zgjedhur mes katër kandidatëve për kryetar, në një fletë votimi ku shorti rendit Fatbardh Kadillin, Edit Harxhin, Agron Shehajn dhe kryetarin në detyrë Lulzim Basha.

Tre të parët kanë si pikë të përbashkët të platformave të tyre sanksionimin në statut të dorëheqjes së kryetarit që humbet zgjedhjet, ndërsa Basha është i përqendruar tek argumentimi se në zgjedhje demokratët u konfirmuan më të bashkuar, por humbja ndodhi për shkak të asaj që e quan masakër zgjedhore.

DASH në mes

Vendimi i Departamentit Amerikan te Shtetit për të shpallur “non grata” ish-Kryeministrin Berisha dhe më pas reagimi i këtij të fundit për të paditur Sekretarin e Shtetit Antoni Blinken, i ka vënë dukshëm në vështirësi demokratët. Dilema qëndron nëse duhet të rreshtohen në krah të liderit të tyre historik, apo në krah të Shteteve të Bashkuara. Kjo dilemë thellohet edhe më shumë kur mendon se Lulzim Basha nuk ka patur një qëndrim të qartë në lidhje me këtë çështje.   Mjafton ky shembull për të kuptuar se sa delikate është situata në selinë blu.

Më 1 qershor kandidatit për kreun e PD-së Agron Shehaj njoftoi përmes faqes së tij në Facebook se kishte takuar  Ambasadoren Yuri Kim, duke nënvizuar ndër radhë se, “Shtetet e Bashkuara të Amerikës kanë qenë në krah të PD-së që në ditët e para të lindjes së saj” dhe se “kjo lidhje, mbështetur në vlerat e lirisë dhe demokracisë, do të forcohet edhe më shumë në të ardhmen”.

Postimi i tij u shoqërua me shumë komente  ku dallohej në shumicë një pakënaqësi apo hatër mbetje e komentuesve lidhur me vendimin DASH ndaj Sali Berishës, por edhe qëndrimin e SHBA pas zgjedhjeve. Pati edhe nga ata komentues që e kishin shigjetuar kandidatin demokrat për një qëndrim jo të qartë në raport me Berishën.

I ndikuar nga këto komente, Shehaj deklaroi në një intervistë televizive se pas takimit me Yuri Kim është sulmuar nga persona, që sipas tij janë demokratë dhe kanë qasje anti-amerikane. Kësaj deklarate ju përgjigj Ervin Salianji i cili theksoi se në PD kurrë s’ka pasur e nuk do ketë antiamerikanë, duke shtuar se këtë shpifje vetëm Rama ka pasur guxim ta thotë.

“Keqardhje për akuzat e rëndomta e mbi të gjitha të pavërteta të  kandidatit Agron Shehaj. Një gjë është e sigurt, që në Partinë Demokratike, nuk ka pasur nuk ka dhe nuk do të ketë asnjeherë vend për asnjë antiamerikan. Në vendin më pro amerikan në botë dhe në partinë më pro amerikane, të kërkosh për antiamerikanë dhe të aludosh se ata janë pjesë e partisë ku bën pjesë  është ofendim i ulët dhe një dëm që tentojnë ti bëjnë PD.  Një gjë të tillë deri më sot me shpifjen që e karakterizon ka guxuar ta thotë vetëm Edi Rama”, shkruan Salianji.

Kandidati për kryetar të Partisë Demokratike, Fatbardh Kadilli, ka zhvilluar të enjten një takim me ambasadoren e SHBA në Tiranë, Yuri Kim. Kadilli thekson se ka ndarë me ambasadoren Kim mendimin se PD është aset i pazëvendësueshëm dhe se, në fillesat e saj është dora e pamohueshme amerikane. “Sot pata kënaqësinë të zhvilloja një takim të gjatë dhe të frytshëm me Ambasadoren e Shteteve të Bashkuara të Amerikës, zonjën Yuri Kim. Biseda u përqendrua  te zhvillimet politike në PD dhe në vend. Jam i lumtur që shpreha në takimin me të dërguarën e vendit më demokratik në botë, dhe aleatit strategjik të Shqipërisë, një zë të protestës kundër mënyrës si shkojnë gjërat në Shqipëri por edhe në partinë time, siç edhe shpalosa Manifestin Politik, jo vetëm për demokratët, por edhe shoqërinë. Me zonjën Kim ndamë mendimin se Partia Demokratike është aset i pazëvendësueshëm dhe se, në fillesat e saj është dora e pamohueshme amerikane”.

Më tej, kandidati në garën e PD deklaron se gjatë takimit është nënvizuar edhe fakti se Uashingtoni dhe Shqipëria, nën udhëheqjen e PD kanë punuar bashkë dhe bërë shumë gjëra të mira.

 

 

Tags: , , , ,


KOMENTO (0)

Shkruaj nje koment

Your email address will not be published. Required fields are marked *

* *

Back