Autobusi i ekipit kombëtar të futbollit të Serbisë ka mbërritur pasditen e sotme në “Arenën Kombëtare” në Tiranë, në kuadër të përgatitjeve për ndeshjen e radhës. Megjithatë, rruga drejt stadiumit nuk ka kaluar pa incidente.
Sipas burimeve nga terreni, pranë Bulevardit “Dëshmorët e Kombit”, një tifoz i vogël në moshë ka goditur nga pas autobusin me një shishe uji. Ngjarja ndodhi ndërsa autobusi po kalonte në mes të një pranie të konsiderueshme të tifozëve dhe qytetarëve.
Reagimi i forcave të rendit ka qenë i menjëhershëm, duke neutralizuar situatën pa përshkallëzime. Ndërkohë, disa tifozë të tjerë kanë ndjekur autobusin duke lëshuar sharje dhe thirrje, por pa ndërhyrje fizike.
Fatmirësisht, nuk raportohet për incidente të tjera apo për dëmtime në autobus apo personel. Ekipi serb ka hyrë i sigurt në ambientet e stadiumit dhe do të vijojë përgatitjet në kushte normale.
Autoritetet kanë shtuar masat e sigurisë në prag të ndeshjes, për të garantuar një mbarëvajtje pa incidente dhe për të ruajtur integritetin sportiv të ngjarjes.
