Në një kohë kur qeveria britanike ka publikuar një paketë ligjore me 5 pika që do të ndalë fluksin e emigrantëve që kalojnë me gomone Kanalin Anglez dhe Gjykata i dha të drejtë Home Office për të deportuar azilkërkuesit në Rëanda, duket se ata që synojnë Britaninë e Madhe i janë rikthyer rrugës së vjetër, me kamion.
Të paktën këtë të lënë të kuptosh fotot e një aksioni të policisë në autostradën M25 pranë Hertfordshire, ku është ndalur një kamion, në të cilin ishin fshehur 9 emigrantë të paligjshëm.
Policia ka ndaluar kamionin frigoriferik që mbante emigrantët e paligjshëm këtë pasdite.
Oficerët dhe publiku u habitën kur nga brenda rimorkios dolën emigrantët e paligjshëm.
“Policia u informua për njerëzit që udhëtonin në pjesën e pasme të një kamioni sot. Kamioni u gjet dhe u ndal në Potters Bar. Nëntë persona ndodheshin brenda. Individët janë kontrolluar nga infermierët dhe janë ndaluar. Oficerët po ndërlidhen me shërbimin e emigracionit. Është arrestuar edhe një person që ka ndihmuar për lehtësimin e hyrjes së paligjshme të tyre”, tha një zëdhënës i policisë.
