Kryesore

Fushatë e re kundër KÇK

               Publikuar në : 10:24 - 30/06/21 liberale

Përgjegjësit e vërtetë të ngjarjeve tragjike në vend, kryeministri Rama i sheh tek të ashtuquajturit “KÇK” brenda sistemit të Drejtësisë. Në një konferencë për mediat, ai u bëri thirrje mediave të demaskonin këta gjykatës që abuzojnë me ligjin. Kreu i qeverisë vlerësoi punën e Policisë së Shtetit dhe mohoi se kishte krizë.

Mund të cilësohet edhe si fushata e dytë ndaj të ashtuquajturit “KÇK”, grupimi brenda sistemit të Drejtësisë që sipas kryeministrit  Rama të vetëdijshëm se nuk e kalojnë vetingun, po bëjnë kërdinë me vendime abuzive.

I nisur dy vjet më parë, në luftimin e të cilit u ngrit edhe Operacioni Forca e Ligjit, sulmi ndaj grupeve “Kap Ç’të kapësh” është rikthyer edhe njëherë në qendër të akuzave të qeverisë.

Në konferencën e djeshme për mediat, kreu i qeverisë mbështeti deklaratat e ministrit të Brendshëm Çuçi, duke e parë fajtorin e vërtetë të tragjedive të ditëve të fundit, pikërisht tek ata gjyqtarë e prokurorë që sipas tyre kanë keqinterpretuar ligjin.

“Policia e Shtetit nuk dënon, reagon, ndalon dhe çon para gjykatës persona që shkelin ligjin”, tha kryeministri, duke shtuar se gjykatat nuk japin as dënimin minimal që parashikon ligji.

“Mediat duhet të bëjnë demaskimin e këtyre gjykatësve sepse janë fakte skandaloze që ndodhin dhe që Gjykatat, ata të cilët janë akoma në detyrë sepse nuk kanë kaluar vetingun dhe abuzojnë”, vijoi Rama, duke thënë se qeveria nuk ka instrumente që t’i bëjë “zap”.

Duke e larguar përgjegjësinë nga Policia e Shtetit, kryeministri i cilësoi si raste të veçuara aksidentin në rrugën Levan-Vlorë , ku humbën jetën një familje me katër anëtar dhe konfliktin e armatosur në Velipojë, ku u vranë katër e u plagosën dy.

“Ngjarjet e ndodhura janë tronditëse, por për turistët atmosfera e një vendi ku me demek turistët nuk duhet të vijnë sepse rrezikojnë të vriten rrugëve, është në ekran, jo në realitet”, ka thënë kryeministri, duke kritikuar për këtë mediat.  Megjithëse siç tha ai, policia as nuk mundet të parandalojë një aksident e as një konflikt mes dy fqinjësh në orë të vona të natës, këta të fundit ishin pronarë hotelesh në bregdet dhe përplasja me armë ndodhi pikërisht në njërin prej tyre, gjatë sezonit turistik.

“Përtej dy ngjarjeve, tre  apo katër, ka gjëra patjetër për të kuptuar dhe shfrytëzuar në funksion të përmirësimit”, do të shprehej kreu i qeverisë.

Ashtu siç lajmëroi pak ditë më parë nga Vlora, edhe dje Rama folu për reformimin e Policisë së Shtetit “…në sensin e ristrukturimit të vazhdueshëm, për të arritur objektivat që kanë të bëjnë me moshën, integritetin, performancën e secilit dhe në teknologji në mënyrë që shumëçka, në aspektin e monitorimit të territorit të bëhet më mirë”.

Rama tha se ky qëndrim i qeverisë nuk ishte lënie e fajit tek të tjerët. “Jetojmë në një sistem ku përgjegjësitë janë personale, kush shkel ligjin duhet të ndalohet dhe dënohet dhe nëse një nga hallkat nuk funksionon, bëhet më e vështirë”, tha Rama.

Ministri Çuçi foli dje për ndryshim të drejtuesve të Policisë së Shtetit dhe hodhi madje idenë se ata do të duhet të kalonin një proces vetingu.

I pyetur nëse ky ristrukturim i nisur pak më herët nga sa ishte parashikuar për shkak të ngjarjeve të fundit, do të prekte edhe drejtorin e Përgjithshëm, Rama siguroi se nuk kishte një krizë brenda Policisë së Shtetit.

“”Nuk e di, nuk e di sesi të shpjegoj që rastet konkrete shikohen në kontekst, nëse ne do të niseshim nga rastet për të hequr njerëz, nuk do kishte ngel më njeri që të merrte një detyrë”.

Ai ka vlerësuar performancën e Policisë dhe ka folur për rritje dhe fuqizim.

Megjithëse opozita ka kritikuar ashpër filozofinë e kryeministrit Rama, në rastet e larjeve të hesapeve mes bandave, si “hënkshin kokat e tyre”, ai nuk ka ngurruar ta përmendë edhe dje.

“Nëse i referohemi disa ngjarjeve që kanë të bëjnë me ngrëniet e kokave mes njëri-tjetrit të kriminelëve, edhe aty duhet të shikojmë reagimin e Policisë së Shtetit, nuk ka një krizë në Policinë e Shtetit”.

Rama foli për ristrukturim që nis nga niveli i drejtuesve në qarqe. Por sipas tij, në një shtet demokratik, nuk është vetëm policia ajo që garanton gjithçka.  Edhe pse në rastin e luftës ndaj KÇK përmes OFL-së,  Policisë së Shtetit iu la hapësirë e madhe veprimi.  Por sipas kryeministrit ky ishte një përkim dhe se ristrukturimi ishte planifikuar që më herët.

Ashtu siç bëri me dije dy ditë më parë ministri Çuçi, edhe kryeministri foli për hetim të pasurisë të drejtuesve me mjete luksoze, të cilët shkelin rregullat e qarkullimit rrugor.

“Për të rinjtë e të rejat që përdorim mjete luksoze dhe që shkelin rregullat nuk do mjaftohemi me gjobë ose heqje patente, por do të hetohen për të ardhurat nëse i kanë ilegjitime”, tha Rama.

Ndaj atyre që flasin për përgjegjësi morale, kryeministri kishte një përgjigje personale. Ai tha se makina e tij respektonte rregullat e qarkullimit dhe se shumë shoferë ministrash janë gjobitur kur i kanë shkelur ato.

“Lënia e turpit për çdo gjë te policia e shtetit jo vetëm që nuk ndihmon për të zgjidhur gjërat, por ndihmon ata që shkelin ligjin”, do të përgjigjej kreu i qeverisë. Por ai bëri përgjegjëse policinë në rastin e incidentit në Sarandë, ku  mbeti i plagosur pronari i një bari dhe një pushues.

“Rasti i Sarandës është përgjegjësi e drejtpërdrejtë e Policisë së Shtetit dhe për këtë arsye janë marrë masat dhe janë bërë goditje brenda policisë së shtetit”, tha ai.

Ashtu siç bëri edhe para nisjes së sezonit turistik, dje kryeministri lëshoi ultimatum për bizneset pa leje në vijën bregdetare.

“Policia e Shtetit do të jetë e pranishme në të gjithë vijën bregdetare dhe do të konfiskojnë çdo lloj çadre a shezlongu tjetër ndihmëse që nuk është e përputhur me bazën dokumentare të subjektit. Plazhet janë të popullit dhe për aq sa subjektet private janë të përfshira në garantimin e një sezonin turistik janë edhe të tyre si përgjegjësi, aty ku kjo përgjegjësi u është njohur ligjërisht.”, tha Rama, duke i ftuar këto biznese të largohen vetë, në të kundërt policia do të veprojë. Edhe pse ky ultimatum u dha pak muaj më parë, nuk i ka ndalur bizneset që operojnë në bregdet t’i zgjidhin vetë mosmarrëveshjet, duke e shmangur ligjin duke përshkallëzuar në fatalitet, si rasti i Velipojës ku katër njerëz mbetën të vdekur për shkak të një hapësire që zinte katër çadra plazhi. Por për këtë nuk duhet fajësuar Policia. Ky është rasti për të sulmuar magjistratët e Sistemit të Drejtësisë, që veprojnë sipas motos të bërë publike nga kryeministri “Kap ç’të kapësh”, edhe pse për reformimin e saj janë ngritur institucione dhe procese si vetingu.

Basha: Punonjësit e ndershëm të policisë janë të tradhtuar nga regjimi

 Kryedemokrati Lulzim Basha ka reaguar pas deklaratave të kryeministrit Edi Rama për policinë e Shtetit, si dhe incidentin mes kryebashkiakut të Lezhës dhe tre efektivëve të policisë.

Basha shkruan në “Tëitter” se punonjësit e ndershëm të policisë janë të tradhtuar nga regjimi Rama-Doshi dhe se zgjidhja është prerja e lidhjeve të pushtetit me krimin. Ndaj sipas tij, fajtori ishte sot pa përgjigje.

“Punonjësit e ndershëm të policisë janë të tradhtuar nga regjimi Rama-Doshi. Kur vjen në pushtet me krimin, policia përdoret si vegël për të mbrojtur lidhjet e pushtetit me krimin. Pasojat e këtij modeli që sundon vendin i vuajnë qytetarët, fëmijët dhe familjet shqiptare.

Zgjidhja është prerja e lidhjeve të pushtetit me krimin. Prandaj fajtori ishte sot pa përgjigje. Peshku qelbet nga koka!”, shkruan Basha në “Tëitter”.

Rama: Nuk ka tolerim në ofendimin e policisë

Kryeministri Edi Rama ka komentuar edhe kallëzimin që 3 efektivë të policisë i kanë bërë kryebashkiakut të Lezhë, Pjerin Ndreu pasi i ka penguar në kryerjen e detyrës. Rama tha se nuk ka asnjë tolerim në ofendimin e policisë dhe se kushdo që gabon, qoftë edhe zyrtarët e lartë duhet të mbajnë përgjegjësitë e tyre.

“Kur vjen puna për ofendimin e policisë askush nuk ka atë drejtë dhe nuk mund t’ia hedh lehët pa u përpallur me ligjin për ofendim e policisë, por kur i bëhet dhe një ofendim i vazhdueshëm kur i hidhet faj  për çdo gjë që ndodh, ky është një ofendim shumë më i madh se sa ai individual i një personi ndaj 2 apo 3 efektivëve. Unë do të shqetësohesha nëse polica dhe strukturat përkatëse nuk do të kishim ndjekur rrugën ligjore, të gjitha gabojmë, të gjithë të përgjigjen për gabimet e tyre, nuk kemi një tolerim të rastit, ku një zyrtar i lartë ofendon një grup të efektivë, por ofendimi i madh është ofendimi i përditshëm dhe mungesa e mbështetjes. Duhet ta përsëris ne jemi të shqetësuar çdo ditë që puna të bëhet më mirë, por të thuash që disa ngjarje shumë të rënda dhe fatkeqësisht na e bëkan Shqipërinë të kthehet pas është shumë qesharake, asnjë turistë nuk po kthehet pas”, tha Rama.

Tags: , ,


KOMENTO (0)

Shkruaj nje koment

Your email address will not be published. Required fields are marked *

* *

Back