Ishulli turistik i Hios në Greqi po përballet me një valë të re zjarresh shkatërrimtare, të cilat prej tre ditësh kanë djegur sipërfaqe të mëdha toke dhe pyjesh, duke detyruar autoritetet të shpallin gjendjen e jashtëzakonshme.

Qindra zjarrfikës, të ndihmuar nga avionë dhe helikopterë, si dhe mbështetje nga qytetet greke Athina, Selaniku dhe ishulli Lesbos, janë angazhuar në betejën me flakët që po përhapen me shpejtësi në disa zona të ishullit. Të martën në mëngjes, mbi 440 zjarrfikës me 85 mjete zjarrfikëse dhe 13 mjete ajrore po punonin për të vënë nën kontroll vatrat.

Pamje dramatike tregojnë re të mëdha tymi të zi që mbulojnë qiellin, ndërsa zjarrfikësit përballen me kushte tepër të vështira. Disa fshatra janë evakuuar që prej së dielës, kur nisën zjarret pranë qytetit kryesor të Hios.

Ministri i Mbrojtjes Civile dhe i Krizës Klimatike, Giannis Kefalogiannis, ka ngritur dyshime për zjarrvënie të qëllimshme, duke theksuar se zjarret kanë shpërthyer në vende të ndryshme, pa ndërlidhje mes tyre. Për këtë arsye, janë shtuar forcat e policisë dhe patrullat ushtarake në terren.

“Kushdo që luan me jetët e qytetarëve dhe shkakton kaos me veprime të qëllimshme do të përballet me drejtësinë,” paralajmëroi ministri.

Zjarret rrezikojnë gjithashtu plantacionet me pemët e mastikës, një prodhim i çmuar për ishullin. Sezoni turistik është në kulm, çka e bën situatën edhe më kritike.