Një situatë tragjike ka goditur shtetin e Teksasit, ku të paktën 24 persona kanë humbur jetën pas përmbytjeve të fuqishme që ndodhën brenda disa orëve, të premten në Qarkun Kerr. Mbi 20 vajza që merrnin pjesë në një kamp veror të krishterë përgjatë lumit Guadalupe rezultojnë ende të zhdukura.
Sipas autoriteteve lokale, përfshirë Sherifin e Qarkut Kerr, Larry Leitha, operacionet e kërkim-shpëtimit janë në zhvillim e sipër, ku janë angazhuar ekipe me varka, helikopterë dhe njësi të ndihmës së shpejtë. Deri tani janë shpëtuar 237 persona, 167 prej tyre me ndihmën e helikopterëve.
“Nuk i dimë ende të gjitha detajet. Disa nga viktimat janë fëmijë, disa të rritur,” tha nënguvernatori i Teksasit, Dan Patrick, duke shtuar se kërkimet do të vazhdojnë gjatë gjithë natës.
Përmbytjet ndodhën pas reshjeve ekstreme, ku u regjistruan mbi 25 cm shi në një kohë shumë të shkurtër. Kjo ka bërë që lumi Guadalupe të dalë nga shtrati dhe të përfshijë zonat përreth me ujëra që lëviznin me shpejtësi të madhe.
Ndërkohë, familjarë të dëshpëruar po përdorin rrjetet sociale për të kërkuar informacion mbi të afërmit e tyre të zhdukur.
