Qeveria greke ka njoftuar masa të reja të ashpra për të luftuar emigracionin e paligjshëm, përfshirë heqjen e një rregulli që u lejonte emigrantëve pa dokumente të aplikonin për leje qëndrimi pas shtatë vitesh qëndrimi në vend. Ministri i Migracionit, Makis Voridis, tha se ky ligj është keqpërdorur dhe se Greqia nuk do të lejojë më legalizimin e atyre që ndodhen ilegalisht në territorin e saj.

“Që tani e tutje, kushdo që ndodhet ilegalisht në Greqi nuk do të legalizohet kurrë,” u shpreh Voridis në një intervistë për televizionin Skai. Ai theksoi se çdo vit rreth 55-65 mijë persona hyjnë ilegalisht në vend, dhe vetëm gjysma e tyre arrijnë të marrin statusin e azilit.

Në vitin 2023, autoritetet greke arrestuan mbi 74 mijë emigrantë të parregullt, por vetëm 2,500 prej tyre u deportuan. Sipas ministrit, shumë të ndaluar pretendojnë origjinë të rreme për të vonuar ose shmangur deportimin, duke e zgjatur procesin për muaj me radhë.

Projektligji i ri, i cili u miratua nga kabineti qeveritar dhe pritet të kalojë në parlament gjatë qershorit, përfshin sanksione të rënda: deri në pesë vite burg për hyrje dhe qëndrim të paligjshëm, si dhe zgjatje të paraburgimit administrativ para deportimit nga 18 muaj në 2 vjet.

Voridis tha gjithashtu se emigrantët pa dokumente mund të zgjedhin kthimin vullnetar në vendin e tyre për të shmangur dënimet.

Ndërkohë, autoritetet greke po përgatitin rregulla të reja për të lehtësuar migrimin e ligjshëm, që do të prezantohen deri në korrik. Këto masa synojnë të përballojnë mungesën e fuqisë punëtore, pasi sipas guvernatorit të Bankës së Greqisë, Yiannis Stournaras, vendit i mungojnë rreth 200,000 punëtorë.