Bombardimet e pamëshirshme vijuan sërish në Gaza ku të paktën 21 palestinezë të vrarë në sulmet në të gjithë Rripin.
Sulmi i ri vjen disa orë pasi forcat izraelite bombarduan Spitalin Nasser në Gaza, duke vrarë të paktën dy persona, duke përfshirë liderin e Hamasit, Ismail Barhoum.
Pamjet, tregojnë shkatërrime të mëdha në repartin e kirurgjisë në spitalin Nasser në Khan Younis. Ministri i mbrojtjes i Izraelit, Israel Katz, konfirmoi se objektivi ishte Barhoum. Barhoum po trajtohej në spital për plagët e marra në një sulm të mëparshëm.
Bombardimet izraelite shënjestruan sërish të gjithë pjesën veriore, qendrore dhe jugore të Rripit të Gazës, ndërsa avionët izraelitë goditën objektivat në ato zona në atë që dëshmitarët thanë se ishte një përshkallëzim i sulmeve që filluan në fillim të javës së kaluar. Sipas ushtrisë izraelite, Hamasi po shfrytëzon infrastrukturën civile ndërsa rrezikon popullatën e Gazës duke përdorur në mënyrë cinike spitalet aktive si një strehë për planifikimin e sulmeve terroriste.
Vrasja e Barhoum erdhi pasi Hamasi tha se forcat izraelite kishin vrarë Salah al-Bardavil, një tjetër anëtar i byrosë politike të grupit, së bashku me gruan e tij në Khan Younis. Izraeli ka vrarë katër anëtarë të byrosë politike të Hamasit që nga e marta e kaluar, kur forcat e tij rifilluan operacionet e mëdha ushtarake në enklavë pas një bllokimi disajavor mbi fazën tjetër të armëpushimit të tij me Hamasin.
Forcat izraelite kanë vrarë më shumë se 600 njerëz që nga rifillimi i ofensivës së tyre në enklavë, sipas zyrtarëve shëndetësorë palestinezë. Të dielën, numri zyrtar i të vdekurve në Gaza që nga fillimi i luftës arriti në 50,000, sipas Ministrisë së Shëndetësisë të Gazës, një shifër që shumë ekspertë besojnë se ka të ngjarë të jetë i vogël në krahasim me numrin e vërtetë.
