Zëvendëspresidenti amerikan nisi një sulm të gjithanshëm kundër Evropës, duke shkaktuar një reagim të fortë nga Brukseli. Berlini i përshkroi deklaratat e Vance si "të papranueshme".
Nënkryetari i SHBA-së, J. D. Vance akuzoi liderët evropianë për censurë dhe dështim për të kontrolluar imigracionin, duke provokuar një reagim të fortë nga Berlini dhe duke lënë në hije bisedimet për luftën në Ukrainë në Konferencën e Sigurisë në Mynih.
Pavarësisht pritshmërive që negociatat e paqes mbi Ukrainën do të dominonin diskutimet, pas telefonatës së fundit të Donald Trump me Vladimir Putin, Vance e përmendi fare pak Rusinë dhe Ukrainën gjatë fjalimit të tij.
Në vend të kësaj, ai argumentoi se kërcënimi më i madh për Evropën nuk është Rusia apo Kina , por "largimi nga vlerat themelore" të lirisë së fjalës dhe imigrimi i pakontrolluar, siç e përshkroi ai.
Deklaratat e nënpresidentit amerikan u perceptuan si një mesazh mbështetjeje për Alternativën për Gjermaninë (AfD) të ekstremit të djathtë gjerman, duke shkaktuar një reagim të zemëruar nga Berlini, i cili i karakterizoi deklaratat e tij si ndërhyrje të padëshiruar në zgjedhjet gjermane.
AfD, e cila po fiton rreth 20% në sondazhet e opinionit përpara zgjedhjeve të përgjithshme të 23 shkurtit, mbetet e izoluar nga partitë kryesore politike për shkak të pozicioneve të saj të së djathtës ekstreme.
Ministri gjerman i Mbrojtjes Boris Pistorius u përgjigj duke i quajtur deklaratat e Vance "të papranueshme". “Zëvendëspresidenti i SHBA-së sot vuri në pikëpyetje demokracinë, jo vetëm në Gjermani, por në të gjithë Evropën”, tha ai nga podiumi i konferencës, duke nënvizuar divergjencën e thellë midis administratës së re Trump dhe liderëve evropianë.
/Liberale.al/
