Simion, kreu i partisë nacionaliste AUR kryeson përballë dy kandidatëve pro-evropianë
Kandidati i ekstremit të djathtë në Rumani, George Simion, fitoi në raundin e parë të zgjedhjeve presidenciale të së dielës, në përsëritjen e votimit të anuluar të vitit të kaluar që e zhyti vendin anëtar e Bashkimit Evropian në trazira politike.
Nacionalisti i ekstremit të djathtë, George Simion është gati të sigurojë një fitore vendimtare në raundin e parë të zgjedhjeve presidenciale të Rumanisë, tregojnë të dhënat paraprake zgjedhore, në zgjedhjet disa muaj pasi një votim i anuluar e zhyti vendin anëtar të Bashkimit Evropian dhe të NATO-s në krizën më të rëndë politike prej dekada.
Z. Simion, udhëheqësi 38-vjeçar i Aleancës për Unitetin e Rumunëve (AUR), po i tejkalon të gjithë kandidatët e tjerë në sondazhe me 40.1% të votave, tregojnë të dhënat zyrtare zgjedhore pasi u numëruan 90% e votave.
Shumë prapa në vendin e dytë është kandidati i përbashkët i koalicionit qeverisës, Crin Antonescu, me 21.1%, dhe në vendin e tretë është kryebashkiaku i Bukureshtit Nicusor Dan me 19.4% - por kjo diferencë pritet gjerësisht të ngushtohet ndërsa numërohen votat nga qytetet më të mëdha.
Njëmbëdhjetë kandidatë garuan për presidencën dhe një balotazh do të mbahet më 18 maj midis dy kandidatëve kryesorë. Sipas Byrosë Qendrore të Zgjedhjeve, në kohën kur u mbyllën qendrat e votimit, rreth 9.57 milionë njerëz — ose 53.2% e votuesve — kishin hedhur votën e tyre, nga të cilët 973,000 vota janë hedhur në qendrat e votimit të ngritura jashtë Rumanisë.
Rumania mbetet në kaos politik që kur Gjykata e Lartë anuloi përpjekjen e parë për mbajtjen e zgjedhjeve në fund të vitit të kaluar. Më pas, përfaqësuesi i ekstremit të djathtë, Calin Georgescu, sfidoi sondazhet duke fituar raundin e parë, por më vonë u zbulua se kishte përfituar nga një fushatë ndërhyrjeje ruse.
Simion votoi të dielën në mëngjes së bashku me Georgescu-n. "Ka ardhur koha për të rimarrë vendin tonë nga horra", deklaroi Georgescu, të cilin Simion ka thënë se do ta emëronte kryeministër nëse fitonte.
