Globi

12-vjeçarja u gjet e vdekur brenda një valixheje, numrat misterioz që iu gjetën në trup

Shkruar nga Liberale
12-vjeçarja u gjet e vdekur brenda një valixheje, numrat misterioz
Franca është tronditur nga vrasja e tmerrshme e një vajze 12-vjeçare, e cila u gjet e pajetë në një valixhe pranë shtëpisë së saj në Paris, të premten mbrëma. Çështja e vrasjes së Lolës së vogël, është kthyer në një thriller, me autoritetet policore që tentojnë të plotësojnë “puzzle”, duke hetuar në thellësi çdo provë që kanë në dorë. Disa nga këto prova rezultuan jashtëzakonisht të dobishme, si për shembull pamjet e kamerave të sigurisë që kapën vajzën e vogël, të veshur me të bardha, duke hyrë në pallatin e shtëpisë, duke ndjekur një grua, në orën 15:20 të së premtes. E njëjta grua u pa më vonë nga dëshmitarët, dhe u kap në një tjetër kamera sigurie, duke mbajtur një valixhe jashtë ndërtesës së banesës së vajzës. Autoritetet besojnë se është e njëjta valixhe në të cilën ndodhej trupi i 12-vjeçares. Një dëshmitar okular përshkruan sjelljen e çuditshme të gruas që doli nga ndërtesa rreth orës 17.00. duke luftuar për të mbajtur objektin e rëndë. “Ajo po mundohej të ngrinte valixhen dhe ne menduam se ishte sepse ishte e rëndë dhe ajo ishte e hollë. Nuk na shkonte as në mendje se brenda kishte një kufomë. Ishte ora 17:00 dhe ajo po ecte me valixhen. Madje në një moment ajo e la jashtë një kafeneje dhe shkoi në furrën përballë për të blerë një briosh, sikur asgjë të mos kishte ndodhur". E dyshuara, e cila shihet në videon në fjalë e veshur me atlete të bardha dhe një xhup gri, u arrestua të shtunën në mëngjes në Bois-Colombes, një komunë franceze në departamentin Hautes-de-Seine, së bashku me motrën e saj. Të dyja të arrestuarat janë të moshës nga 20 deri në 30 vjeç. Një tjetër element që shqetëson autoritetet janë numrat misterioz "1" dhe "0" të gjetur në trupin e Lolës së vogël, jo të gdhendur apo të pikturuar në trupin e pajetë, por të "ngulitur" me një lloj "pajisje", sipas një burimi të policisë, cituar nga kanali francez BFMTV. Trupi i 12-vjeçares u gjet vetëm disa orë pasi prindërit e denoncuan për zhdukjen e saj. Nëna e saj iku me shpejtësi tek autoritetet, duke shpjeguar se vajza e saj nuk ishte kthyer nga shkolla. Hetuesit policorë gjetën shenja rrëmbimi në bodrumin e pallatit dhe nisën hetimet duke përdorur të gjitha mjetet që kishin në dispozicion. Vajza u gjet pak larg shtëpisë së saj, brenda një valixheje plastike, e lidhur në kyçet e këmbëve dhe kyçet e dorës, me shirit izolues rreth fytyrës dhe disa prerje në zonën e qafës. Një autopsi e kryer të shtunën tregoi vdekjen nga asfiksia./Përshtati Liberale.al

Liberale Newsroom

Poll
SHQIPENGLISH