Aktualitet

Stërvitjet bërthamore të Rusisë, Putin mbikëqyrur nga afër manovrat

Shkruar nga Liberale
Stërvitjet bërthamore të Rusisë, Putin mbikëqyrur nga

Presidenti rus, Vladimir Putin, ka mbikëqyrur stërvitjet vjetore bërthamore të forcave strategjike bërthamore të Rusisë, në kohën e rritjes së tensioneve me Perëndimin, pas nisjes së luftës në Ukrainë.

Raketat balistike dhe ato lundruese janë nisur nga lindja e largët e Rusisë dhe Arktiku, ka thënë Kremlini.

Shtetet e Bashkuara janë njoftuar për këto stërvitje, sipas traktatit për armët, Starti i Ri.

Këto testime janë kryer teksa Rusia ka bërë pretendime të pabazuara se Ukraina është duke planifikuar përdorimin e “bombave ndotëse”.

Bombat ndotëse janë pajisje shpërthyese, të përziera me material radioaktiv.

Perëndimi ka hedhur poshtë akuzat e Rusisë, duke i konsideruar ato të rreme.

Kievi ka thënë se pretendimet e Moskës nënkuptojnë se vetë ajo mund të jetë duke u përgatitur për një sulm të tillë.

Para stërvitjeve, zyrtarët ushtarakë në Uashington kanë thënë se njoftimi i Rusisë te ata, tregon se rusët janë duke zbatuar obligimet sipas traktatit për armët.

Përndryshe, edhe NATO-ja është duke kryer stërvitjet e veta bërthamore në veriperëndim të Evropës.

Lufta në Ukrainë ka nisur më 24 shkurt.

Presidenti rus, Vladimir Putin, e konsideron luftën si “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.

Liberale Newsroom

Poll
SHQIPENGLISH