Teori të shumta studimore tregojnë se drejtuesit e aftë përgjithësisht i kanë tiparet të lindura. Debati mes studiuesve nëse veç tipareve të lindura, aftësitë përmirësohen nga të mësuarit, mbetet i hapur. 50 me 50 supozohet se është edhe përqindja ideale e talentit dhe të mësuarit që duhet të zotërojë një drejtues i aftë. Për t'u aftësuar nga të mësuarit vlen i gjithë procesi i jetës. Universitetet kudo në botë kanë një degë të specializuar që është menaxhimi, por praktikisht shumë nga studentët që përfundojnë një degë të tillë nuk marrin kurrë në jetë një post drejtuesi. Kjo për arsyen sepse atyre u mungojnë aftësitë e lindura.
Atëherë çfarë është dhe përse shërben Shkolla e Drejtorëve në vendin tonë? A ia vlen të mbahet nga taksapaguesit një e tillë? Cili është produkti i saj?
Ja një shembull. Shkolla e Drejtorëve, një institucion që prej 7 vitesh ofron trajnime të detyrueshme për drejtuesit e arsimit parauniversitar, po zgjerohet gjithnjë e më shumë edhe në qarkun e Shkodrës.
Dhjetëra mësues dhe aspirantë për drejtues janë përfshirë aktualisht në programet e kësaj shkolle, e cila synon të rrisë cilësinë e drejtimit në institucionet arsimore.
“Interesi është goxha i lartë. Ne aktualisht jemi në brezin e shtatë. Kemi pothuajse rreth 400 pjesëmarrës, të cilët e ndjekin programin në gjithë Shqipërinë. Nga Shkodra kemi një grup prej rreth 60 pjesëmarrësish të ndarë në dy grupe. Në Shkodër, ky është brezi i dytë i programit dhe nga viti në vit shohim një rritje të pjesëmarrësve në programin e ekselencës,” thotë Eurona Leka, menaxhere e programit të Shkollës së Drejtorëve.
Pjesëmarrësit trajnohen për të zhvilluar kapacitetet e reja menaxheriale, për të udhëhequr me vizion dhe për të ndikuar pozitivisht në cilësinë e mësimdhënies.
“Shkolla e lidershipit është më shumë për të kuptuar që nuk duhet parë për drejtimin e një shkolle, por si një menaxher i së ardhmes, për të qenë bashkëpunues me mësuesit, nxënësit dhe prindërit,” thotë Ardita Uka, një aspirante në programin e trajnimit.
Risia e këtij programi - thonë drejtuesit e tij - qëndron në ndryshimin e filozofisë së drejtimit të shkollës nga një qasje tradicionale autoritare, drejt një modeli bashkëkohor kolegjial dhe gjithëpërfshirës.
