Plani i Mbretërisë së Bashkuar për të dërguar azilkërkuesit e refuzuar në “qendrat e kthimit” në vendet e treta tregon se Britania pas Brexit-it është vendosur “në një pozicion shumë të errët”, tha për “The Guardian” kryeministri i Shqipërisë.
Në intervistën e tij të parë me median ndërkombëtare The Guardian që kur udhëhoqi partinë e tij socialiste drejt një mandati të katërt historik, Edi Rama tha se ideja që Mbretëria e Bashkuar të “kërkonte vende për të larguar emigrantët” do të kishte qenë e pakonceptueshme një dekadë më parë. Rama shpjegoi mes të tjerave pse e refuzoi propozimin e kryeministrit Britanik, kur vizitoi rreth një muaj më parë Tiranën, dhe pranoi atë të Giorgia Melonit, duke e konsideruar Italinë një partner më pranë vendit tonë dhe më të veçantë.
Rama, i cili mbush 60 vjeç në korrik, e zhvilloi fushatën e tij zgjedhore me premtimin se do të ecte përpara me axhendën e anëtarësimit në BE. Ai tani beson se negociatat do të përfundojnë deri në vitin 2027 dhe "brenda vitit 2030 do të jemi anëtar i BE-së". Shqipëria, e cila iu bashkua NATO-s në vitin 2009, ka qenë kandidate për anëtarësim për më shumë se një dekadë.
“E gjithë qasja ndaj procesit ka ndryshuar në mënyrë dramatike”, tha ai. “Tani ata [BE] janë shumë të etur të ecin përpara… Me agresionin rus gjithçka ndryshoi, kështu që në një farë mënyre edhe Vladimir Putin ndikoi për këtë, ai e bëri Evropën shumë më të interesuar për bashkimin”.
Rama, në artikullin e “The Guardian” sheh një efekt të ngjashëm në BE nga udhëheqësi i ri i Shtëpisë së Bardhë dhe është “100% i bindur se zgjedhja e Donald Trump është diçka e mirë për Evropën”. Rama tha se fitorja e Trump e nxori Evropën nga plogështia e saj dhe kishte sjellë “një frymë shqetësuese” që i nevojitej botës.
“Mendoj se kur Trump thotë se Zoti e shpëtoi (atentati) sepse kishte një plan për Amerikën, mendoj se ai thotë vetëm gjysmën e së vërtetës. Zoti e shpëtoi sepse kishte një plan edhe për Evropën, për ta zgjuar Evropën”, thekson Rama.
Piktori shqiptar i kthyer në kryeministër do të nisë së shpejti një turne falënderimi për komunitetet e diasporës të cilat, për herë të parë, patën mundësi të votonin në zgjedhjet e muajit të kaluar, duke e ndihmuar atë të siguronte një fitore të thellë. Më shumë se 500,000 shqiptarë etnikë mendohet se jetojnë vetëm në Greqi. Shpresa e Ramës është se ai mund t'i tërheqë ata të kthehen "sepse tani pagat tona janë shumë të ngjashme me ato në Greqi dhe është shtëpia jonë".
Por udhëheqësi i partisë socialiste, i gjatë 2.01 metra, një ish-lojtar basketbolli, ka edhe kritikët e tij. Akuzat për korrupsion në shoqërinë shqiptare janë të përhapura. Po kështu janë edhe akuzat për autoritarizëm në rritje - Rama do të jetë udhëheqësi më jetëgjatë që nga koha e Enver Hoxhës, ish-diktatori brutal i vendit - megjithëse akuzat etiketohen si farsë nga admiruesit dhe politikanët në Bruksel.
Një ish-ministër i BE-së tha: “Edi është më i madh se mosha. Problemi i tij është se është shumë i madh për vendin e tij dhe nuk e kam fjalën për gjatësinë e tij.”
Nëse Shqipëria do të arrinte sukses në përpjekjen e saj për anëtarësim, tha Rama, do të ishte “momenti i duhur dhe më i mrekullueshëm për të kaluar pishtarin”. Do të ishte një arritje personale, por gjithashtu “do ta ndihmonte Evropën të ishte më pak e mërzitshme dhe më me diell”.
/Përgatiti: Liberale.al/
