Partia e Lirisë, pjesë e koalicionit “PD-ASHM”, ka prezantuar kandidatët e saj për deputetë në zgjedhjet parlamentare të 11 Majit. Gjatë këtij eventi, një fjalim pati edhe nga Presidenti i Partisë së Lirisë, Ilir Meta, nëpërmjet një audio-mesazhi.
Në fjalën e tij, Meta ka theksuar se 12 vjet janë një periudhë shumë e gjatë për një vend që ka humbur rreth një milion qytetarë aktivë dhe se Shqipëria është vendi i fundit në rajon për nivelin e eksporteve dhe me taksat më të larta.
“12 vjet është koha shumë e gjatë për një vend, i cili ka humbur gati një milion qytetarë aktivë. 12 vjet dhe jemi jo vetëm vendi i fundit në rajon për nivelin e eksporteve. Sot, pas 12 vjetëve, jemi vendi me taksat më të larta, por edhe më të shtuara gjatë kësaj kohe në rajon, por çuditërisht jemi edhe vendi me nivelin më të ulët të mbledhjes së të ardhurave publike. Pesë prioritetet e Partisë të Lirisë, të miratuara një vit më parë, në Konventën Historike të 27 Prillit, janë pjesë e marrëveshjes tonë të koalicionit që do të ndalë shpopullimin dhe që do të kulmojë me shndërrimin e Shqipërisë në një fuqi eksportuese”, tha Meta.
Meta ka theksuar se modeli i Partisë së Lirisë për mbështetje të familjeve të reja, mbështetje konkrete të sektorit bujqësor dhe mbështetja e prodhimin vendas dhe fuqizimin industrial të vendit.
“Modeli hungarez, shumë i suksesshëm, për mbështetjen e familjeve të reja, për strehimin e tyre dhe nxitjen e lindshmërisë, është edhe modeli ynë. Modeli maqedonas për mbështetjen konkrete për çdo njësi prodhimi në bujqësi dhe për çdo lopë, dele, dhi, shpendë dhe koshere, do të jetë modeli ynë. Modeli maqedonas i krijimit të zonave të lira, do të jetë modeli ynë për tërheqjen e investimeve të huaja me rritjen e eksporteve. Sepse modeli ynë do të jetë mbështetja e prodhimit vendas dhe jo falimentimi i tij me qëllim lulëzimin e “Ballkanit të Hapur”. Sepse modeli ynë është fuqizimi industrial i vendit përmes rritjes së produktivitetit dhe vlerës së shtuar të lëndëve të para. Sepse modeli ynë është fuqizimi i kapitalit njerëzor dhe rritjes së cilësisë në arsim. Sepse modeli ynë është mbështetja e sportit dhe jo e drogës. Sepse modeli ynë është mbështetja e trashëgimisë kulturore dhe jo e shkatërrimit të saj”, shtoi ai.
Një nga pikat kryesore të fjalës së Ilir Metës ishte angazhimi për ndryshimin e Kodit Elektoral, duke siguruar 100% hapjen e listave dhe barazinë e votës, e cila, sipas tij, është shkatërruar nga Edi Rama dhe sistemi i listave të mbyllura.
Në përfundim, Meta ka bërë thirrje për mbështetje të koalicionit “PD–ASHM”, duke e konsideruar këtë si mundësinë e vetme për një ndryshim të vërtetë.
“Duke votuar për ne ata votojnë jo vetëm për barazinë para ligjit, por së pari për barazinë e votës, e cila është shkatërruar nga Edi Rama për të eliminuar llogaridhënien dhe zgjedhjet e ndershme. Më 11 Maj, shqiptarët do të votojnë praktikisht vetëm për 1/3 e Kuvendit, sepse 2/3 e Kuvendit është e paracaktuar, për shkak të Edi Ramës, shpikësit të listave të mbyllura. Ndaj Partia e Lirisë, garanton të gjithë qytetarët shqiptarë se prioriteti i saj i parë do të jetë ndryshimi i Kodit Elektoral për të garantuar 100% hapjen e listave dhe barazinë e votës. Ndaj për këtë koalicionit tonë i duhen 84 mandate që ta realizojë këtë ndryshim vendimtar menjëherë dhe pa Edi Ramën, armikun e zgjedhjeve të lira dhe të ndershme, në partinë e tij dhe në Shqipëri. Vota për këtë aleancë, “PD – Aleanca për Shqipërinë Madhështore” është vota për ndryshimin historik”, përfundon mesazhi i tij.
