Partia Demokratike pritet të përballet me ndryshime të reja në përbërjen e kryesisë, pas zgjedhjeve të fundit dhe riformatimit të komisioneve parlamentare. Megjithëse kryetari Sali Berisha ka deklaruar qartë se nuk do të hapë një garë të re për drejtimin e PD-së dhe asnjë nga drejtuesit aktualë nuk pritet të japë dorëheqje, disa lëvizje do të ndodhin automatikisht.
Nga 33 anëtarë të kryesisë së PD-së, 14 janë “anëtarë ex officio”, që do të thotë se janë pjesë e kryesisë për shkak të funksioneve që mbajnë në Kuvend. Me ndryshimin e përbërjes së komisioneve parlamentare, disa prej tyre do të humbin automatikisht vendin në kryesi, pasi nuk mbajnë më ato funksione.
Kush pritet të largohet?
Zheni Gjergji, që ishte futur në kryesi si kryetare e Komisionit të Shëndetësisë, nuk është më deputete dhe rrjedhimisht humbet edhe vendin në kryesi. E njëjta gjë ndodh edhe me Dhurata Çupin, e cila ishte në kryesi për shkak të rolit si nënkryetare e Komisionit të Ligjeve.
Ndryshime priten edhe për Ferdinand Xhaferraj, që ishte pjesë e kryesisë si nënkryetar i Komisionit të Sigurisë, dhe Helidon Bushatin, që nuk është rizgjedhur si deputet.
Emrat që mbeten në pikëpyetje
Për disa emra të njohur si Jorida Tabaku, e cila mori një mbështetje të madhe në zgjedhje, mbetet për t’u parë nëse do të vazhdojë të drejtojë Komisionin e Integrimit. Nëse jo, edhe ajo mund të mos jetë më pjesë e kryesisë.
Në një situatë të paqartë janë edhe Agron Gjekmarkaj dhe Gazment Bardhi. Ky i fundit është ende në krye të grupit parlamentar të PD-së, por Berisha nuk ka dhënë ende një vendim të qartë për të ardhmen e tij në këtë rol.
Shtatori, muaji i vendimeve
Ndryshimet në komisionet parlamentare pritet të ndodhin në shtator, dhe ky do të jetë muaji që do të përcaktojë se kush do të qëndrojë dhe kush do të largohet nga kryesia e Partisë Demokratike. Edhe pse Berisha nuk pranon të zbatojë “nenin Basha”, që kërkon hapje të garës për kreun e partisë pas humbjes në zgjedhje, ndryshimet në përbërjen e kryesisë janë të pashmangshme për shkak të rregullave statutore.
