Pas një kërkese nga Qendra e Situatave e Qeverisë së Kosovës, dhe në koordinim me partnerët ndërkombëtarë, Forca e Sigurisë së Kosovës (FSK) ka ndërmarrë një operacion humanitar për kërkimin e një personi të zhdukur në liqenin e Ujmanit.
Komandanti i FSK-së ka urdhëruar menjëherë ekipet e kërkim-shpëtimit në ujëra që të nisin operacionin. Ekipet janë angazhuar me përkushtim dhe kanë bashkëpunuar ngushtë me Policinë e Kosovës, Agjencinë për Menaxhimin e Emergjencave (AME) dhe KFOR-in.
Pas disa orësh kërkimi intensiv dhe profesional, është gjetur trupi i pajetë i viktimës në zonën e liqenit. Trupi i është dorëzuar Policisë së Kosovës dhe ekipit të forenzikës për procedurat e mëtejshme ligjore.
