Autoriteti Kombëtar i Ushqimit ka dalë me një njoftim zyrtar mbi një rast të ditëve të fundit, ku pas analizave të kryera, është konstatuar se një sasi filetosh pule të importuara nga Brazili ishin të kontaminuara me Salmonelë.
AKU njofton se ka marrë masa për bllokimin e produktit të kontaminuar, gjurmimin dhe verifikimin e rastit, dhe ka referuar materialet në Prokurorinë e Tiranës për veprime të mëtejshme.
Njoftim i plotë AKU-së:
Në kuadër të transparencës dhe informimit të publikut, si dhe për të garantuar sigurinë ushqimore dhe mbrojtjen e shëndetit të konsumatorëve, Autoriteti Kombëtar i Ushqimit ka ndërmarrë një sërë masash të menjëhershme dhe të strukturuara për të adresuar një situatë të identifikuar para disa ditësh gjatë kontrollit të produkteve ushqimore të importuara në Portin e Durrësit.
Referuar analizës në ISUV në datën 21.03.2025, për prani të Salmonella Typhimurium në një mostër produkt pule (fileto e ngrirë) të importuar nga Brazili, AKU ka ndërhyrë në mënyrë të koordinuar me strukturat përgjegjëse për gjurmimin, verifikimin dhe bllokimin e produktit, si dhe për marrjen e masave administrative dhe ligjore ndaj subjektit përgjegjës.
Subjekti importues është inspektuar për ndjekjen e gjurmueshmërisë dhe është referuar në Prokurorinë e Rrethit Gjyqësor Tiranë për veprime të mëtejshme proceduriale lidhur me elementët e veprës penale për mosrespektimin e kritereve të gjurmueshmërisë dhe dhënien e informacionit të pasaktë.
Autoriteti Kombëtar i Ushqimit siguron publikun se situata është në ndjekje të vazhdueshme dhe se çdo veprim është ndërmarrë në funksion të transparencës, sigurisë dhe mbrojtjes së shëndetit të qytetarëve.
Për çdo zhvillim të mëtejshëm, AKU do të vijojë të informojë në mënyrë të saktë dhe të përgjegjshme.
