Drejtori i burgut të sigurisë së lartë të Peqinit, Florenc Doka ka dhënë dorëheqjen nga posti i tij. Ky vendim është bërë publik ditën e sotme, ndërsa nuk dihen ende arsyet e largimit të Dokës nga detyra, i cili mbante këtë post që prej vitit 2023.
Sipas informacioneve bëhet me dije se, Florenc Doka ka dorëzuar zyrtarisht kërkesën e tij për dorëheqje, e cila është pranuar dhe miratuar nga Ministri i Drejtësisë.
Theksojmë se dorëheqja vjen në një moment kur institucioni që ai drejtonte ka qenë pjesë e vëmendjes për çështje të ndryshme që lidhen me administrimin dhe funksionimin e burgjeve në vend, megjithatë nuk ka të dhëna që e lidhin këtë vendim me ndonjë ngjarje të veçantë.
Florenc Doka kishte një eksperiencë disa-vjeçare në sistemin penitenciar dhe gjatë kohës së drejtimit të IEVP Peqin ka qenë i angazhuar në implementimin e disa masave reformuese në këtë institucion.
Aktualisht nuk është bërë ende e ditur se kush do ta zëvendësojë atë në këtë post, ndërsa Ministria e Drejtësisë pritet të bëjë një emërim të ri në ditët në vijim.
