Ka kaluar alarmi për Rey Manajn. Sulmuesi është stërvitur rregullisht këtë të enjte me pjesën tjetër të Kuqezinjve dhe do të jetë në dispozicion të trajnerit Sylvinho për ndeshjen e rëndësishme të së shtunës.”
28-vjeçari do të jetë kështu një alternativë më shumë për Kombëtaren në përballjen me Serbinë, rivali direkt për vendin e dytë.
Manaj pati temperaturë në ditët e para të grumbullimit që e lanë jashtë grupit, ndërsa qëndroi nën vëzhgimin e mjekëve, duke kryer edhe kontrolle të specializuara.
Në seancën e së enjtes taktika ka qenë pjesë e përgatitjeve madje futbollistë janë ndarë në dy grupe duke provuar edhe goditjet në portë. Stërvitja zyrtare do të zhvillohet në 19:30 të së premtes në stadiumin “Air Albania”.
Më herët Sylvinho do të dalë në konferencë, ku mund të kuptohet më shumë nga strategjia e Kuqezinjve për këtë ndeshje kualifikuese të Botërorit 2026. Seanca e përfaqësueses serbe do të zhvillohet në orën 18:00.
Ndeshja Shqipëri – Serbi do të luhet të shtunën në mbrëmje prej orës 20:45 dhe do të transmetohet direkt në TV Klan.
