Të shtunën e 7 qershorit do të luhet ndeshja mes Shqipërisë dhe Serbisë, e vlefshme për kualifikueset e Botërorit.
Policia ka nisur marrjen e masave, për të garantuar sigurinë në përballjen delikate me Serbinë.
Bizneset në perimetrin e stadiumit “Arena Kombëtare”, ku të shtunën do të zbresë Kombëtarja shqiptare përballë Serbisë, kanë nisur të heqin tendat, por edhe pajisjet e tjera të bar-kafeve.
Nga e premtja pranë stadiumit do të jetë një perimetër i boshatisur, për shkak të masave të policisë. Për këtë ndeshje, do të jenë 1500 forca policie.
Nga sot ka nisur boshatisja e hapësirave, që do të jenë në izolim total nga pasditja e së premtes, deri në përfundim të ndeshjes së vlefshme për eliminatoret e Botërorit 2026.
