Presidenti i Serbisë, Aleksandër Vuçiç ka thënë në një intervistë për Financial Times se vendimi i BE për t’i mbajtur dyert të mbyllura për Shqipërinë dhe Maqedoninë e Veriut e ka lënë rajonin të kuptojë që nuk mund të mbështetet vetëm tek fqinjët perëndimorë. “Ne duhet të kujdesemi për veten. Kjo është mënyra e vetme, kjo është qasja e vetme. Çdo gjë tjetër do të ishte shumë e papërgjegjshme, “tha Vuçiç. Beogradi është gati të nënshkruajë një marrëveshje të tregtisë së lirë me Bashkimin Ekonomik Euroaziatik, një bashkim doganor me qendër në Moskë me pesë anëtarë, dhe gjithashtu ka bërë thirrje për integrim të mëtejshëm rajonal. “Unë nuk do qaj përpara zyrave qendrore të Këshillit Europian”, tha Vuçiç duke shtuar se, “nuk mund të varemi nga vendimi tjetër i Këshillit Evropian, ose nëse qeveria Holandeze do të vendosë në këtë mënyrë ose në një mënyrë tjetër, ose nëse qeveria daneze do të bëjë diçka ndryshe nga sa prisnim,” Theksi i Presidentit serb ishte tek forcimi i lidhjeve rajonale gjë e cila u reflektuar tek takimi i fundit tripalësh me kryeministrat Rama dhe Zaev për “mini-shengenin ballkanik”.  

Regional cooperation cannot substitute #EU accession process of #WB6. Acknowledging the reality on the ground would be a major breakthrough ending regional mistrust, helping the implementation of reform process efficiently and effectively. Hence, ensuring the path towards #EU! https://t.co/zpwXN4vjL9

— Ditmir Bushati (@ditmirbushati) October 23, 2019

Lidhur me deklaratat e forta të Vuçiç ka reaguar ish-ministri i Jashtëm, Ditmir Bushati. Nëpërmjet një statusi në Twitter, ai ka thënë se cilado qofshin nismat rajonale ato nuk mund të zëvendësojnë integrimin e Ballkanit Perëndimor në Bashkimin Europian. “Bashkëpunimi rajonal nuk mund të zëvendësojë procesin e anëtarësimit të Ballkanit Perëndimor në BE. Pranimi i realitetit do të ishte një përparim i jashtëzakonshëm për ti dhënë fund mosbesimit në rajon, për të ndihmuar në implementimin e reformave në mënyrë efektive dhe efiçente. Kështu pra duke siguruar rrugën drejt Bashkimit Europian” ka shkruar Bushati. Takimi i fundit për bashkëpunim rajonal në Ballkan ka qenë ai për “mini-shengenin” ballkanik mes Shqipërisë, Serbisë dhe Maqedonisë së Veriut. Një nisëm kjo e mbështetur fort jo vetëm nga presidenti serb por edhe nga kryeministri Rama. Por ish-ministri i jashtëm në qeverinë e tij mesa duket e sheh me skepticizëm atë duke nënvizuar perspektivën europiane si prioritet absolut që nuk mund të zëvendësohet.