Vendimi i mazhorancës për të mos kaluar në mënyrë të njëanshme ndryshimet në Kodin Zgjedhor erdhi pasi Opozita e Bashkuar dorëzoi të dielën në mbrëmje një draft për listat dhe koalicionet, ndërsa ambasadorët e BE dhe SHBA kërkuan që propozimi i PD-LSI të diskutohet në Këshillin Politik
Tre ditë nga votimi i Reformës Zgjedhore në Parlament, maxhoranca është tërhequr nga vendimi për ta kaluar në seancë ndryshimet, ndërsa Opozita jashtëparlamentare ishte kundër ndryshimit të formulës së koalicioneve dhe propozimit të PS për listat e hapura. Vendimi i mazhorancës për të mos kaluar në mënyrë të njëanshme ndryshimet në Kodin Zgjedhor erdhi pasi Opozita e Bashkuar dorëzoi të dielën në mbrëmje një draft të vetën për Reformën Zgjedhore, ku listat e kandidateve për deputetë hapen 100%, por duke korrigjuar përfaqësimin gjinor dhe ku votat ndaheshin nëpër koalicione me listë shumemërore, siç janë edhe sot.
Edhe pse gjatë gjithë paradites komisioni i Ligjeve diskutoi për propozimet e PS dhe atë të Opozitës parlamentare duke i lënë kohë propozimit të Opozitës së Bashkuar vetëm ditën e mërkurën pra një ditë para votimit të Reformës Zgjedhore, gjithçka është ndërprerë në mbrëmjen e djeshme. Maxhoranca vendosi të shtyjë votimin e ndryshimeve pa dhënë një shpjegim zyrtar dhe një datë kur do të miratohet Kodi I ri elektoral.
Ajo që bien ë sy se ka ndikuar në këtë vendim që shmang votimin e njëanshme të rregullave të lojës, ishin qëndrimet e dy ambasadorëve të SHBA dhe BE në Tiranë. Ata kërkuan që çdo propozim përtej marrëveshjes së 5 qershorit të përfshihet në Këshillin Politik dhe të diskutohen në mënyrë gjithëpërfshirëse dhe bashkëpunuese.
Yuri Kim
Ambasadorja e SHBA, Yuri Kim në deklaratë të bërë nga Himara ka folur për zhvillimet e fundit mbi reformën zgjedhore. Diplomatja amerikane tha se mirëpret propozimet e bëra nga opozita jashtë Parlamentit dhe gatishmërinë e shprehur nga mazhoranca për t’i përfshirë në debat këto propozime.
“Jam shumë e kënaqur për faktin se opozita jashtëparlamentare ka marrë përgjegjësinë e saj për të qenë e angazhuar për të vazhduar për të përfaqësuar popullin.
Siç edhe e theksova para disa ditësh, është tejet e rëndësishme që opozita të mbetet e angazhuar, dhe të gjitha partitë të sjellin propozime reale dhe gjithashtu dhe kundër propozime real.
Kam kuptuar që sot opozita ka bërë një propozim konkret, dhe jam shumë e kënaqur që kam dëgjuar gjithashtu që PS ka thënë që do ta marrë këtë kundër propozim dhe do të ketë një debat real për ta përfshirë.
Ky standard i transparencës dhe i përfshirjes, është saktësisht ajo që duhet të presim nga një vend anëtar i NATO-s, dhe një vend i cili kryeson OSBE. Janë standarde të larta, por ju i meritoni ato”, deklaroi znj. Kim.
Sipas ambasadores amerikane partitë politike në Shqipëri duhet t’i qëndrojnë marrëveshjes së 5 qershorit, pasi firmat e liderëve të tyre ndodhen në atë dokument.
“Mendoj që pozita e SHBA ka qenë shumë e qartë, 5 qershori ishte gjithëpërfshirës dhe transparent. Çdo parti që ka nënshkruar atë letër, duhet t’i qëndrojë fjalës së dhënë, është çështje nderi. Firma ime nuk ndodhet mbi atë letër. Janë ata që kanë nënshkruar atë letër personat përgjegjës për të zbatuar 5 qershorin.
Pritshmëria ime është që ‘5 qershori’ do të nderohet. Nëse palët do të bien dakord për masa të tjera përtej 5 qershorit, do të ishte shumë mirë dhe ne do t’i mbështesim. Por, le të shikojmë se çfarë do të ndodhi”, përfundoi zyrtarja amerikane.
Yuri Kim ka kaluar fundjavën në Himarë ku ka vizituar disa prej pikave turistike si dhe ka zhvilluar takime të ndryshme mes të cilëve me kryetarin e bashkisë dhe kreun e Kadastrës. Znj. Kim tha se, zgjidhja e problemeve të pronësisë do të ishte një hap i madh drejt thithjes së investimeve amerikane në Shqipëri.
Luigi Soreca
Ambasadori i Bashkimit Evropian në Tiranë, Luigi Soreca, iu bashkua të hënën apelit të Ambasadores Amerikane Yuri Kim duke bërë thirrje që palët politike të respektojnë marrëveshjen e 5 qershorit.
Përmes një postimi në Tëitter, Soreca theksoi se çdo ndryshim i propozuar duhet të diskutohet dhe arrihet me konsensus në Këshillin Politik.
“Ritheksojmë qëndrimin tonë që marrëveshja e 5 qershorit, e cila ka zbatuar rekomandimet e OSBE / ODHIR mbi reformën zgjedhore , duhet të respektohet. Ne gjithashtu konfirmojmë rëndësinë që çdo propozim për ndryshime të mëtejshme në nenet e kodi zgjedhor, të cilat shkojnë përtej fushëveprimit të marrëveshjes së 5 qershorit, të diskutohen siç duhet në kuadrin e Këshillit Politik në një mënyrë bashkëpunuese dhe gjithëpërfshirëse përpara se të votohet në Parlament”, shkruan Soreca.
Pas kësaj shtyrjeje Këshilli Politik do të diskutojë draftin e Opozitës së Bashkuar dh vendimi që do të dalë aty është shumë i rëndësishëm për mënyrën sesi do të vijojë situata paraelektorale në vend. Në rastin e gjetjes shenjë kompromisi atëherë do të thotë se rregullat janë të pranuara nga të gjitha palët dhe mbetet që të nisë fushata elektorale për të paraqitur para elektoratit programet dhe ekipet përkatëse. Por nëse do të kemi një mosdakortësi për Kodin Zgjedhor atëherë klima para zgjedhore do të vijojë të jetë e rënduar dhe rezultati i 25 prillit i paragjykuar.
Reforma Zgjedhore, Ligjet nisin debatin për ndryshimet
Komisioni parlamentar i ligjeve nisi diskutimin mbi ndryshimet e Kodit Zgjedhor të propozuar nga Partia Socialiste dhe nga deputetë të opozitës parlamentare.
Deputeti i opozitës Muslim Murrizi tha se “projekti i sjellë nga PS për listat, nuk sjell lista të hapura plotësisht dhe i ngjan më shumë një sondazhi brenda partisë, që dëmton garën e ndershme elektorale”.
Ai ka sjellë 4 amendamente për Kodin Zgjedhor, që janë për hapjen e plotë listave të kandidatëve për deputet, për një prag 3%, rillogaritje të mandateve në bazë të pragut, si dhe mbi mënyrën e numërimit.
Zoti Murrizi tha se, “meqë komisionet zgjedhore nuk u depolitizuan si kërkoi OSBE-ja, atëherë së paku të depolitiziohen grupet e numërit të votave”.
Sipas socialistëve, propozimi i tyre është për një listë të hapur, shoqëruar me një prag dhe me një mekanizëm të mbrojtjes së gjinisë, për të favorizuar kandidatet femra.
Deputeti i Partisë Socialiste, Damian Gjiknuri, tha se me ndryshimin e Kushtetutës formula e deridjeshme e koalicioneve dhe ndarjes së mandateve nuk mund të qëndrojë më.
Koalicionet, sipas konceptit që sjellin socialistët janë dy ose më shumë parti, që paraqesin një listë të përbashkët me vendet e përcaktuara qartë në të për secilin aleat.
Por sipas opozitës jashtëparlamentare, ato që propozojnë socialistët nuk janë lista të hapura por një spekulim me termat, në mënyrë që kryetari të ruajë kontrollin mbi kandidatët.
Partia Demokratike dhe Opozita e Bashkuar dërguan mbrëmë në Këshillin Politik draftin për hapjen 100% të listave të kandidatëve, pa ndryshuar modelin e koalicioneve siç është në fuqi në Kodin Zgjedhor.
Opozita theksoi se me dekretimin e datës së zgjedhjeve procesi zgjedhor ka nisur, partitë mund të regjistrohen në KQZ dhe rregullat e garës nuk mund të ndryshojnë më.
Opozita përsëriti kërkesën për t’iu drejtuar ODIHR-it për mosmarrëveshjet, që partitë të paraqiten secila me listat e veta dhe të garojnë me koalicione.
Komisioni parlamentar i ligjeve miratoi sot në parim ndryshimet e Kodit Zgjedhor, ndërsa pritet të mbajë nesër një mbledhje tjetër për shqyrtimin e tyre nen për nen.
Po nesër pritet të mbahet një tjetër mbledhje e Këshillit Politik mbi draftet që janë atje mbi atë tryezë të dytë, dhe mbetet e paqartë se si projektet e diskutuara në Këshill do mund të zyrtarizohen e të përfshihen në procedurat parlamentare.
Ndërkohë që afati është ngushtuar në vetëm dy ditë dhe parlamenti mblidhet në seancë plenare më 1 tetor. /Gazeta Liberale
