Drejtoresha e Teatrit Kombëtar të Operas dhe Baletit dhe Ansamblit Popullor, Zana Çela ka reaguar pasi nuk u zgjodh për një mandat tjetër drejtues.
Pas gjashtë vitesh në krye të Teatrit Kombëtar të Operas dhe Baletit u zgjodh një tjetër drejtuese, Abigeila Voshtina, violiniste dhe ish-drejtoreshë artistike në Opera.
Ndërkohë Zana Çela ka thënë për “BalkanWeb” se, nuk ka marrë ende dokumentin e lirimit nga detyra.
“Në bazë të procedurave administrative, dokumenti quhet i marrë në administrim kur shkresa – vendimi vjen me protokoll, ky quhet dokumenti zyrtar që më jep të drejtën finale të informimit dhe zbatimit të vendimit. Me ta pasur këtë dokument do të shprehem plotësisht”, është shprehur ajo, ndërkohë që Këshilli i Ministrave ka nxjerrë një vendim me 22 qershor, ku liron nga detyra Zana Çelën dhe emëron në detyrë Abigeila Voshtinën.
