Si lexohen votat për kandidatët

Votat preferenciale mund t’u shërbejnë partive analizë më të thellë mbi kandidatët që qytetarët duan. Por  mund të jenë gjithashtu tregues i lobimit të fortë brenda partive. Ngjan se lufta brenda llojit ka qenë po aq e ashpër, për të mos thënë edhe më shumë, se ajo me kundërshtarin politik, që deklaron se ka pasur blerje të votës.

Vota për kandidatin, risi e këtyre zgjedhjeve ndonëse emrat u përkthyen në numra, më shumë sesa një opsion më shumë për qytetarët sesa vetëm e drejta për të zgjedhur partinë, u kthye në një garë të ethshme të brendshme.

Shumë u habitën dhe spekuluan me zgjedhjen e kryeministrit apo të drejtuesve të qarqeve – veçanërisht Veliajt në Tiranë –kur pranë emrat e senatorëve të Partisë Socialiste në pozicione jo fort të sigurta në listat zgjedhore.

Vetë kreu i qeverisë shpjegoi se kjo qe strategji e socialistëve në këto zgjedhje, duke vendosur anëtarët e vjetër në atë që ai e etiketoi si “vijë zjarri”.

Vendosja e emrave si Ruçi, Balla, Majko, Kodheli apo Xhafaj në vijën e kufirit të mandateve që PS kishte fituar në zgjedhjet e kaluara, sipas strategjisë së pranuar edhe nga vetë kandidatët në fjalë, do t’i çonte votuesit socialistë të shtynin edhe më fort në votime për të pasur në parlament emrat e vjetër. Kjo vinte edhe si kontrast i kritikave dhe ironisë me listat e kundërshtarit, sipas kryeministrit me emra dhe personazhe “fosile”.

Vetë kandidatët do të mohonin zërat se ky ishte pasqyrim i ndonjë pakënaqësie të kryesocialistit me ta apo skemë për t’i larguar nga pushteti legjislativ.

Ndërsa në qarkun e Elbasanit, PS arriti të marrë tetë mandate, aty ku ishte renditur Sekretari i Përgjithshëm i partisë, Taulant Balla i cili deklaroi se me rezultatin mund të ishte renditur fare mirë edhe i nënti.

Nga numërimet e votave për kandidatët, deri dje, Balla rezultonte më i votuari jo vetëm në qark, por mes të gjithë socialistëve në të 12 qarqet me më shumë se 21 mijë vota.

I renditur i dhjetë në listë, Kreu i Kuvendit Gramoz Ruçi, e siguroi mandatin për Legjislaturën e re pasi kandidati Bashkim Fino u nda nga jeta pak ditë para zgjedhjeve. Megjithatë, edhe Ruçi është i treti më i votuar në qarkun e Fierit me mbi 13 mijë vota, ndërsa listën e të preferuarit e kryeson zv/kryeministri Erion Braçe, i renditur gjithashtu i pari në listë.

Surprizat erdhën nga qarku i Tiranës. Ish-ministri i Brendshëm Fatmir Xhafaj i renditur i 23-ti në listën zgjedhore të PS-së e ka thyer herësin duke siguruar më shumë se 15 mijë vota preferenciale.

“Shifrat tashmë publike konfirmojnë se e kam kaluar pragun minimal për të qenë deputet në legjislaturën e ardhshme të Kuvendit të Shqipërisë”, shkruante Xhafaj në rrjetet sociale, duke shtuar se fushata e tij kishte qenë modeste në shpenzime.

Ndërsa Xhafaj e ka arritur objektivin për të qenë deputet i Parlamentit të ri, me 18 mandatet e fituara nga PS për qarkun e Tiranës do të thotë se një tjetër do të duhet të dalë nga lista e sigurt dhe fituese. Me votat e numëruara deri dje, më të rrezikuarit ishin Ervin Bushati dhe Fidel Ylli ,të cilët kanë shënuar edhe numrin më të vogël të votave preferenciale.

Përmbysja më e madhe do të shënohej nga kandidati i ri i PS për qarkun e Tiranës, Ornaldo Rakipi i cili ka arritur të thyejë herësin dhe të hyjë brenda listës fituese, ndonëse ishte renditur i 30-ti.

27 vjeçari Rakipi, djali i ish-deputetit të PDIU Aqif Rakipi- i larguar nga parlamenti për shkak të dekriminalizimit-, ka arritur të sigurojë më shumë se 13 mijë vota preferenciale.

Jashtë Parlamentit ngelen përfundimisht ministri i Diasporës, Pandeli Majko dhe ish-ministrja e Mbrojtjes Mimi Kodheli.

Në një intervistë televizive, Kodheli do të shprehej se mosmarrjen e mandatit parlamentar do t’ia faturonte vetes, ndërsa ishte e renditur e 21-ta në listë.

Mes më të pëlqyerve tek socialistët duket se është edhe ministrja e Infrastrukturës Belinda Balluku, e cila ka siguruar më shumë se 14 mijë vota preferenciale. Po ashtu, edhe Etjen Xhafaj ka rezultuar me më shumë se 12 mijë vota preferenciale, duke e çimentuar vendin e tij të sigurt brenda listës fituese, i renditur i 12-i.

Një tjetër emër i mbetur jashtë parlamentit është edhe ai i Ilir Beqajt, i renditur i katërti në qarkun e Shkodrës.

“Objektivi bazë në këto zgjedhje për Partinë Socialiste ishte 4 mandate deputetësh. Ky objektiv nuk u përmbush. Dhe unë, padyshim, kam detyrimin t’i kërkoj ndjesë sot socialistëve shkodranë”, shkruante Beqaj.

I renditur i pesti në Berat, aty ku edhe u nda vija e zjarrit me PS-në që mori pesë mandate, Blendi Klosi ka siguruar të marrë më shumë se 12 mijë vota.

Befasi ka pasur edhe në kampin e Partisë Demokratike, ku Luçiano Boçi i renditur i shtati në qarkun e Elbasanit ka thyer herësin. Me gjashtë mandate të fituara nga PD në këtë qark, Boçi ka spostuar nga lista fituese kandidatin Eugen Isaj.

Nuk ka rezultuar me aq fat kandidati demokrat në Shkodër Bardh Spahia, i renditur i shtati. Me dy mandate të fituara në atë qark, Spahia nuk ka mundur ta thyejë herësin megjithëse ka marrë më shumë se 7 mijë vota preferenciale.

Listën e më të parapëlqyerve në PD e kryeson vetë kryedemokrati Basha me më shumë se 14 mijë vota, megjithëse ishte i renditur i pari. Një rezultat që tregon- ndryshe nga zërat brenda partisë që kërkojnë dorëheqjen e tij- se është i preferuar mes votuesve.

Basha duket se nuk ndoqi strategjinë e kundështarit të tij në këto zgjedhje për të vendosur në të ashtuquajtur vija zjarri apo kufiri mandatesh emrat e vjetër të PD-së. Mes shumë të pëlqyerve në PD ka rezultuar edhe kandidati Agron Shehaj, i cili ka siguruar më shumë se 12 mijë vota. Shehaj nuk e ka pasur të nevojshme thyerjen e herësit, pasi ishte i renditur i gjashti në qarkun e Tiranës.

Po ashtu mes më të votuarve ka rezultuar edhe kandidati Belind Këlliçi, edhe pse me më pak se 10 mijë vota. Grida Duma gjithashtu ka arritur të sigurojë më shumë se 8 mijë vota preferenciale si kandidate në qarkun e Tiranës.

Me 15 mandate të fituara në Tiranë, ku në vijën e kufirit ishte kandidatja Oriola Pampuri, jashtë parlamentit kanë mbetur emra si Aldo Bumçi dhe Ivi Kaso, të renditur fill pas.

Tirana duket se nuk ka rezervuar surpriza për demokratët, ku asnjë kandidat i renditur poshtë 15-s nuk e ka thyer herësin, megjithëse e preferuar mes tyre ka rezultuar edhe moderatorja Oriela Nebiaj. Në Korçë, më i votuari nga kandidatët ka rezultuar Ervin Salianji, i cili ka siguruar afro 10 mijë vota.

Vetë kryeministri Rama, i renditur i teti në të dy qarqet, Vlorë dhe Durrës, ka arritur të mbledhë pak më shumë se 14 mijë vota preferenciale por jo më shumë se Lulzim Basha, edhe pse garuan në qarqe të ndryshme, me numër të ndryshëm votuesish.

Megjithatë Rama ka rezultuar të jetë më i votuari i socialistëve për të dy qarqet.

Në Durrës më të pëlqyer pas tij kanë qenë Lefter Koka, Rrahman Rrahja e Jyrgis Çyrbja, emra këta të lakuar nga kryedemokrati si të lidhur me krimin.

Në një listë që nis me më të votuarin, tek më pak i votuari ndër kandidatët është edhe emri i kryetares së LSI, Monika Kryemadhi- e cila ka dalë fituese në Fier me mandatin e vetëm dhe në Tiranë. Ajo ka arritur të mbledhë rreth 1800 vota preferenciale në Tiranë dhe mbi 2 mijë në Fier. Mes pesë mandate të fituara në 12 qarqet, duket se në LSI nuk ka pasur kandidatë që thyejnë herësin.

Gara më e fortë e kandidatëve rezultoi brenda Partisë Socialiste, ku megjithatë emrat e vjetër ia kanë dalë të jenë sërish në parlament, ndërsa emrat e rinj që kryesuan listën në qarkun e Tiranës nuk kanë rezultuar mes më të preferuarve të votuesve.

Votat preferenciale mund t’u shërbejnë partive edhe për një analizë më të thellë mbi kandidatët që qytetarët duan, tani që Kodi Zgjedhor prezantoi votën për kandidatët duke hapur kështu- edhe pse jo plotësisht – hapi listat. Modeli i fletës së zgjedhur rezultoi në shumë vota të pavlefshme, mbi 80 mijë. Por këto vota mund të jenë gjithashtu tregues i lobimit të fortë edhe brenda partive. Ngjan se lufta brenda llojit ka qenë po aq e ashpër, për të mos thënë edhe më shumë, se ajo me kundërshtarin politik, që deklaron se ka pasur blerje të votës.

Luçiano Boçi: Qytetarët më votëbesuan ndershmërisht

Në një mesazh në Facebook, Boçi i cili arriti të thyejë herësin dhe të sigurojë vendin si deputet në Parlamentin e ri, ka falënderuar votuesit e qarkut Elbasan ku ishte renditur i shtati. Boçi do të përfshihej gjatë fushatës në një incident me biznesmenin Gjergj Luca, në përfundoi në përleshje fizike dhe padi nga të dyja anët në prokurori.

Mesazhi:

Shumë pak të shprehësh vetëm falënderime për qytetarët e qarkut Elbasan, të cilët më votëbesuan ndershmërisht, me ideal e vërtetësi, pa u ndikuar as nga paratë e pushtetit, as nga dhuna e tij, as nga joshjet e miklimet për favore!

Nuk mjafton vetëm mirënjohja për strukturat e Partisë Demokratike të qarkut e drejtuesit e tyre, komisionerët, vëzhguesit, grupet mbështetëse, përfaqësuesit e ZAZ-ve, numëruesit, të gjithë anëtarët e PD, të cilët më përkrahën pa bujë e zhurmë, po me shpirt e zemër, në këtë betejë të pabarabartë me të keqen!

Përulje respekti për ekipin tim të mrekullueshëm e të jashtëzakonshëm, të palodhur, plot jetë, vlera e vizion, me vajza e djem të mençur, entuziastë e me shumë dëshirë për të ardhmen!

Nderime pa fund për shokët e miqtë e mi të shumë brezave e shtresave e bashkëpunëtorët e kaq viteve politikë, të cilët nuk u shkëputën as një minutë e centimetër nga lufta krah meje!

Vlerësime të sinqerta e të vërteta për Kryetarin e PD, zotin Basha që me besoi kandidimin, për Gazin që drejtoi me dinjitet fushatën e qarkut, për grupin cilësor të deputetëve që me diferencat e qëndrimeve e opinioneve kalimtare, më motivuan më shumë.

Në fund, familja ime tashmë e rritur në numër, jam vetë unë!

Megjithatë nuk mund të bërtas dot FITORE, sepse kjo e imja është thjesht një rreshtim i ri pranë të gjithëve ju!Beteja për të çrrënjosur të keqen që ka pushtuar vendin vazhdon…

20 më të votuarit

 Pas numërimit të votave preferenciale të kandidatëve në të 12 qarqet, më i votuari ka rezultuar Taulant Balla në qarkun e Elbasanit, i ndjekur nga Erion Braçe. Nga demokratët kryeson kreu Lulzim Basha, i ndjekur nga kryeministri Edi Rama, i cili ka siguruar më pak vota preferenciale se kundërshtari i tij politik

Në shifrat e publikuar nga KQZ deri tani, rezulton duke zbuluar në këtë formë se ato as veten e tyre nuk e kanë votuar. Sakaq 144 prej tyre rezultojnë se kanë marrë vetëm 1 vote, që me shumë siguri është një votë për veten./Gazeta Liberale

Tags: gazeta liberale, kandidate, vota, zgjedhje