Bujar Spahiu, Kreu i Komunitetit Mysliman të Shqipërisë, uroi me ngrohtësi gjithë shqiptarët për festën e Kurban Bajramit, duke bërë thirrje për paqe, bashkim dhe solidaritet.
Në mesazhin e tij, ai theksoi se Kurban Bajrami është më shumë se një ritual simbolik. Ai është një shprehje e devotshmërisë dhe besimit ndaj Zotit, duke përmendur historinë e Pejgamberit Ibrahim dhe sakrificën e tij si shembull për besimtarët.
Spahiu ftoi besimtarët të kujdesen për të varfrit dhe të ndajnë me ata që kanë më pak, duke rikujtuar rëndësinë e solidaritetit dhe ndihmës ndaj fqinjëve dhe të afërmve, siç e kërkon tradita islame.
Në përfundim, ai uroi nga zemra një Kurban Bajram të bekuar për të gjithë, duke lutur që Zoti të udhëzojë njerëzimin drejt paqes dhe mëshirës.
