Vera sjell probleme tek të vegjlit. Çdo ditë në urgjencën pediatrike në QSUT, paraqiten mesatarisht 200 fëmijë për të kërkuar ndihmë mjekësore, 15% prej tyre shtrohen për trajtim në spital. Sipas shefit të shërbimit të urgjencës pediatrike në QSUT, Albert Lama, rastet e paraqitura dominojnë kryesisht me infeksione të aparati tretës, gastroenterite.

“Në urgjencë paraqiten mesatarisht 200, në fundjavë edhe më e madhe. Ajo që shohim sot tregon sesi është gjendja. Zakonisht është 10-15% e rasteve që ne trajtojmë, që kërkojnë trajtim më të specializuar…. dominojnë infeksionet e traktit gastro-intestinale, kemi kryesisht infeksione që prekin aparatin tretës, gastro-intestinale, bark e të vjella. Janë të shoqëruara apo jo me temperaturë. Nuk kemi probleme të tjera respiratore, të sipërme apo të poshtme”, u shpreh Dr.Shk.Albert Lama – Shef shërbimi në urgjencën pediatrike.

Grupmosha më e prekur është një deri në 4 vjeç. Teksa i nxehti përvëlues ka pushtuar vendin, mjeku Lama jep këshilla sesi të kujdesemi për të vegjlit.

“Mosha më e prekur sa më e vogël aq më e riskuar, 1-4 vjeç më e prekur. Si këshilla të bëjnë kujdes për higjienën sanitare, për sëmundshmërinë të bëjnë ndjekjen e duhur, ekspozimi në diell, duhet të ruhen nga rrezatimi, të shmanget ora nga 9-16 pasdite”, ka thënë ai.

Teksa jemi në pikun e sezonit veror, mjekët pediatër këshillojnë prindërit që kondicionerët nuk duhet të gradohen më ulët se 25 gradë, pasi ka efekte negative tek të vegjlit.