Kryeministri dhe njëherazi kreu i PS, Edi Rama zhvilloi sot një takim me deputetët dhe deputetet e Partisë Socialiste ku mbajti një fjalim për triumfin historik në zgjedhjet e 11 majit.
Pjesë nga fjala e kryeministrit Edi Rama:
Për të arritur qëllimet duhet të fitosh zgjedhjet. Fitoret na duhen për të përmbushur misionin historik që kemi. Për të ndryshuar përgjithnjë Shqipërinë, duke zhvilluar ekonominë, garantuar drejtësinë, përmirësuar arsimin e shëndetësinë, forcuar sigurinë, rritur reputacionin e atdheut dhe për të bërë histori me anëtarësimin në BE brenda kësaj dekade.
Na duhet një punë e madhe me veten në radhë të parë. Përsëri këtë herë, duhet ta nisim nga vetja për ta ndarë mendjen si duhet. Na duhet mirëkuptim brenda nesh për të kuptuar e më pas për të na kuptuar. Për ta përdorur mandatin e katërt së pari si fuqi vetëkorrigjuese. Jemi ngjitur aq lart sa askush s’e ka besuar.
