Detaje të reja janë zbuluar nga ngjarja tragjike që ka tronditur të gjithë Italinë një ditë më parë, kur Ilaria Sula u vra me thikë nga i dashuri i saj, Mark Samson.

22-vjeçarja me origjinë shqiptare ishte shpallur e zhdukur prej 25 marsit, për t’u gjetur vetëm në orët e para të ditës së djeshme e vdekur, brenda një valixheje të hedhur në një zonë pyjore jashtë qytetit të Romës. Pas shumë përpjekjesh nga ata e hetuesve, filipinezi pranoi krimin duke treguar se si i mori jetën shqiptares, e megjithatë kjo ngjarje mbetet ende në mister nga disa detaje që janë të pazbardhura.

Sipas avokates Anila Halili, dyshohet se krimi ka ndodhur në shtëpinë e filipinezit Samson, në një moment kur aty ndodheshin dhe prindërit e tij. Misteri qëndron në faktin që ata kanë deklaruar se nuk dinin asgjë për ngjarjen dhe nuk kanë dëgjuar konflikt mes djalit të tyre dhe të resë.

“Ngjarja ka ndodhur në shtëpinë e djalit. Në momentin e krimit, dyshohet se në shtëpi ishin dhe prindërit e 23-vjeçarit. Misteri është se si ka mundësi që ata kanë thënë që nuk dinin asgjë. Si ka mundësi që nuk kanë dëgjuar një të bërtitur nga Ilaria apo një zhurmë nga mobiliet”,– tha ajo.