Një operacion ndërkombëtar i koordinuar nga Europol dhe shërbimet e sigurisë italiane, spanjolle dhe shqiptare ka çuar në arrestimin e 28 personave, të dyshuar si anëtarë të organizatës famëkeqe mafioze italiane ‘Ndrangheta’, mes tyre edhe shtetas shqiptarë.

Mes të arrestuarve është një italian nga Kalabria, i dyshuar si drejtues i një rrjeti kriminal për trafikun e kokainës në zonën e San Basilios në Romë. Sipas hetimeve, ai ka bashkëpunuar ngushtë me një grup shqiptar, i cili luante rol kyç në logjistikën e trafikut ndërkombëtar të drogës.

Shqiptarët dyshohet se menaxhonin ngarkesat e drogës që vinin nga Amerika Latine, përmes porteve spanjolle dhe holandeze, dhe më pas siguronin transportin drejt Italisë. Gjithashtu, ata kishin rol aktiv edhe në shpërndarjen e lëndëve narkotike në disa zona të Romës.

Ngarkesat e drogës përfundonin në portin e Gioia Tauros në Kalabri, ku më tej shpërndaheshin nga anëtarë të ‘Ndrangheta’-s. Sipas të dhënave zyrtare, grupi dyshohet se ka trafikuar të paktën 1,019 kg kokainë dhe 1,497 kg hashash, përmes 80 operacioneve të ndryshme.

Hetuesit zbuluan gjithashtu akte të rënda dhune brenda rrjetit: katër persona italianë akuzohen se rrëmbyen dhe torturuan një trafikant, duke i shkaktuar trauma të rënda fizike dhe psikologjike. Tortura u filmua dhe videoja u përdor për të frikësuar dhe kontrolluar anëtarët e tjerë të organizatës në Romë.

Europol ka luajtur një rol kyç në këtë operacion, duke vendosur në terren një ekspert me zyrë të lëvizshme që verifikoi informacionin me bazat e të dhënave dhe ofroi mbështetje analitike financiare, si dhe lehtësoi komunikimin mes autoriteteve italiane dhe spanjolle. Si pjesë e hetimit janë realizuar edhe pesë arrestime në Spanjë, përpara ditës së ndërhyrjes.