BE pezullon tarifat hakmarrëse kundër SHBA-së për t'u dhënë një shans negociatave
Bashkimi Evropian ka pezulluar përkohësisht kundër-tarifat kundër Shteteve të Bashkuara për të vazhduar bisedimet me administratën e Donald Trump se si të zgjidhet ajo që në orët e fundit po merrte formën e një lufte tregtare gjithëpërfshirëse.
Pezullimi do të mbetet në fuqi për të paktën 90 ditë.
Kundër-tarifat, të vendosura si reagim ndaj detyrimeve të Trump mbi çelikun dhe aluminin, u miratuan të mërkurën nga shtetet anëtare, dhe synonin thuajse 21 miliardë euro në produkte amerikane, të tilla si soja, bakri, hekuri, motoçikletat, anijet deri te lëngu i portokallit.
Sasia e parë, me vlerë 3.9 miliardë euro, ishte planifikuar të hynte në fuqi më 15 prill.
Por gjithçka ndryshoi në orët e fundit. “Ne duam t’u japim një shans negociatave”, tha Ursula von der Leyen, presidentja e Komisionit Evropian, në një deklaratë të shkurtër.
"Ndërsa jemi duke finalizuar miratimin e kundërmasave të BE-së që panë mbështetje të fortë nga shtetet tona anëtare, ne do t'i pezullojmë ato për 90 ditë", shtoi ajo. - “Nëse negociatat nuk do të jenë të kënaqshme, do të hyjnë në fuqi kundërmasat tona."
Vendimi i Von der Leyen vjen vetëm disa orë pasi Trump, nën presion të fortë nga tregjet, njoftoi se "tarifat reciproke" të vetëshpallura do të pezullohen për 90 ditë. "Mos u hakmerrni dhe do të shpërbleheni", tha Shtëpia e Bardhë.
Blloku fillimisht ishte goditur nga një normë prej 20% sipas tarifave gjithëpërfshirëse, duke tronditur Brukselin dhe kryeqytetet e tjera. Zyrtarët e Komisionit e hodhën poshtë formulën e Shtëpisë së Bardhë si "as të besueshme dhe as të justifikuar" dhe u zotuan se do të hakmerren "atje ku dhemb".
Pas ndryshimit të vendimit të Trump, importet e BE-së në Amerikë do të vazhdojnë të kenë normën bazë prej 10%. Çeliku, alumini dhe makinat do të mbeten subjekt i një norme të veçantë prej 25%.
Von der Leyen vuri në dukje se puna e brendshme për të përgatitur "kundërmasa të mëtejshme" do të vazhdojë, duke sinjalizuar pasiguri të thellë në lidhje me të ardhmen e politikave tregtare të Trump.
Të gjitha opsionet mbeten në tryezë.
I pyetur pse Komisioni nuk do të hakmerrej kundër tarifave të mbetura, të cilat megjithatë pritet të dëmtojnë ekonominë e BE-së të orientuar drejt eksportit, një zëdhënës tha se përparësia kryesore ishte gjetja e një kompromisi me Uashingtonin.
BE ka shtypur butonin e pauzës për të lënë hapësirë për negociata, megjithëse, tarifat e çelikut dhe aluminit të SHBA-së janë në fuqi, jo vetëm kundër Europës, por kundër të gjithë botës. Dhe madje, edhe tarifat e makinave janë në fuqi.
Më herët të enjten, von der Leyen e dyfishoi propozimin e saj për një marrëveshje tarifore "zero për zero" për të gjitha mallrat industriale midis BE-së dhe SHBA-së, të cilën presidenti amerikan e ka hedhur poshtë, duke e konsideruar, sipas tij, të pamjaftueshme.
Trump kërkoi që BE-ja të rrisë blerjet e energjisë amerikane për të balancuar sa më shpejt tregtinë e mallrave. (Në vitin 2023, BE-ja regjistroi një suficit mallrash me SHBA-në me vlerë 156.6 miliardë euro, por një deficit shërbimesh me vlerë 108.6 miliardë euro.)
Komisioni, i cili ka juridiksion ekskluziv për të përcaktuar politikën tregtare për bllokun me 27 anëtarë, është përpjekur të kuptojë se cili mund të jetë qëllimi përfundimtar i Trump.
Zyrtarët dyshojnë se republikani është rikthyer midis qëllimeve për të ribalancuar marrëdhëniet tregtare dhe për të krijuar një burim të ri të ardhurash përmes mbledhjes së detyrimeve të larta dhe për të promovuar riindustrializimin e Amerikës, pa e ditur saktësisht se cilis duhet t'i japë përparësi.
Privatisht, zyrtarët thanë se kanë shpresuar se trazirat e tregut të shkaktuara nga iniciativa e paprecedentë e Trump për të rregulluar rendin ekonomik pas Luftës së Dytë Botërore do të ishin të mjaftueshme për t’i ndryshuar mendjen.
