Gjykata Kushtetuese në Tajlandë shkarkoi këtë të mërkurë kryeministrin Srettha Thavisin nga detyra për një shkelje etike, duke tronditur më tej politikën tajlandeze pasi ajo urdhëroi shpërbërjen e partisë kryesore opozitare një javë më parë.
Gjykata Kushtetuese vendosi mbi një çështje që përfshin emërimin nga Srettha të një anëtari të kabinetit i cili ishte burgosur në lidhje me një përpjekje të supozuar për të korruptuar një zyrtar gjykate.
Gjykata votoi 5-4 kundër Srettha-s dhe vendimi e largoi atë menjëherë nga detyra.
Kabineti do të qëndrojë në vend në bazë të përkohshme derisa Parlamenti të miratojë një kryeministër të ri. Një votim u caktua nga Parlamenti të premten, por nuk ka afat kohor për plotësimin e pozicionit. Kabineti i përkohshëm gjithashtu mund të shpërndajë Parlamentin dhe të thërrasë zgjedhje të reja.
Srettha, duke folur në godinën qeveritare menjëherë pas vendimit, falënderoi gjyqtarët që i dhanë mundësinë për t'u mbrojtur. Ai tha se e respektonte vendimin dhe se gjithmonë kërkoi të vepronte në mënyrë etike gjatë kohës së tij në detyrë, e cila ishte më pak se një vit.
Në një skandal që nuk ka lidhje me vendimet e fundit politike, Tajlanda është përmendur ditët e fundit lidhur me mbetjet toksike që mbërritën nga Shqipëria.
Kontejnerët e nisur nga porti i Durrësit me destinacion Tajlandën, që dyshohet se janë të mbushur me mbetje të rrezikshme, do të kthehen sërish në Shqipëri.
“Bloomberg” raporton se për shkak të denoncimeve të bëra nga organizata ndërkombëtare të mbrojtjes së mjedisit, kompania Maersk ka vendosur të kthejë dy anijet që mendohet se janë të ngarkuara me rreth 800 tonë mbetje industriale nga Shqipëria.
Anija e parë “A.P” Moller” që transporton 40 kontejnerë me mbetje pritet të mbërrijë të enjten në Singapor dhe sipas “MSC Mediterranean Shipping Company” do të kthehet sërish në Itali, dhe prej atje në Durrës. Ndërkohë anija tjetër me 60 kontejnerë pritet të mbërrijë në Singapor në fund të muajit gusht dhe po ashtu do të kthehet mbrapsht për në shqipëri.
Zëdhënësja e Maersk, Sumerr Shi ka deklaruar se kompania po sigurohet që kontejnerët të kthehen në Shqipëri në mënyrën më të sigurtë të mundshme.
Alarmi për anijet me mbetje të rrezikshme u lëshua nga“Basel Action Network” një organizatë jo fitimprurëse amerikane që ndjek tregtinë e lëndëve toksike. Sipas kësaj organizate, më shumë se 800 ton pluhur nga furra elektrike u ngarkuan në portin e Durrësit në muajin korrik dhe kishin si destinacion final Tajlandën.
Pluhuri nga furrat, që kërkon trajtim, është një produkt mbeturinash të rrezikshme që zakonisht vjen nga riciklimi i hekurit të përdorur dhe përmban okside metalesh toksike si kadmiumi dhe kromi, të cilat janë të dëmshme për shëndetin dhe mjedisin.
