"Brain fog" apo mjegulla mendore është një term që ka fituar shumë vëmendje kohët e fundit, veçanërisht pas pandemisë COVID-19.

Megjithatë, shkencëtarët thonë se ky fenomen ka qenë i njohur edhe më herët, sidomos në komunitetet që vuajnë nga sëmundje kronike si fibromialgjia dhe sindroma e lodhjes kronike.

Kjo simptomë, që përfshin humbje të përqendrimit, harresë dhe ngadalësim të mendimit, mund të shkaktohet nga sëmundje të ndryshme dhe shpesh është një nga më të vështirat për t’u trajtuar, sipas një artikulli nga "National Geographic".

Jacqueline Becker, neuropsikologe në Shkollën e Mjekësisë të Mount Sinai në New York, shpjegon se "brain fog" është një grup simptomash dhe jo një diagnozë dhe mund të lidhet me probleme të përqendrimit, memories dhe ngadalësisë mendore.

“Një nga pasojat më të rënda është se mund të ndikojë thellë në jetën e pacientëve,” ka thënë ajo.

Përderisa ende nuk ka një definicion të qartë shkencor për këtë fenomen, shkencëtarët po kërkojnë shkaqet e mundshme, si inflamacioni dhe dëmtimi i barrierës gjak-tru.

Studimet sugjerojnë se infeksioni COVID-19 mund të shkaktojë një përgjigje të tepruar të sistemit imunitar, që vazhdon të ndikojë në tru edhe pas përfundimit të infeksionit akut.

Kjo mund të çojë në inflamacion të vazhdueshëm dhe humbjen e sasisë së lëndës gri dhe të bardhë në tru, gjë që kontribuon në mangësi të aftësive njohëse.

Në një studim të publikuar në shkurt 2024, Colin Doherty, neurolog në Trinity College Dublin, dhe ekipi i tij zbuluan se pacientët me "brain fog" pas COVID-19 kishin të përçarë barrierën gjak-tru.

Ata sugjeruan se një barrierë e tillë mund të lejojë kalimin e substancave të dëmshme në tru, duke shkaktuar inflamacion dhe duke prishur proceset normale metabolike të trurit.

Përveç kësaj, faktorë të tjerë si ndryshimet hormonale, sidomos ato që ndodhin gjatë menopauzës, dhe mosfunksionimi i mikrobiomës së zorrëve, mund të kontribuojnë gjithashtu në shfaqjen e mjegullës mendore. Këto kërkime kanë hapur mundësi të reja për trajtimin dhe diagnostikimin e "brain fog".

Për ata që ndjejnë simptoma të këtij fenomeni, specialistët rekomandojnë shqyrtimin e faktorëve të stilit të jetesës, si ushqimi, aktiviteti fizik dhe gjumi i mjaftueshëm.

Për individët që përjetojnë mjegull mendore për një periudhë të gjatë, mund të jetë e nevojshme të konsultohen me një mjek për të hetuar shkaqet e mundshme dhe për të marrë trajtime të përshtatshme.

Shkencëtarët thonë se ende ka shumë për të mësuar rreth "brain fog" dhe kërkime të mëtejshme janë thelbësore për të kuptuar më mirë këtë fenomen dhe për të ofruar trajtime më efektive./ Liberale.al