Pas muajsh thashethemesh, Cardi B ka konfirmuar (pa folur fare) lidhjen e saj të re, duke u shfaqur për herë të parë publikisht me futbollistin e New England Patriots, Stefon Diggs.

Dyshja u ulën pranë fushës në Madison Square Garden gjatë ndeshjes Knicks–Celtics, ku nuk munguan përkëdheljet dhe gjestet intime, që flisnin vetë.

Prej shkurtit, kur u panë bashkë në Ditën e Shën Valentinit, fansat kanë spekuluar për një romancë, por duket se tani gjërat janë bërë serioze. Cardi i fërkonte butësisht fytyrën Stefonit, ndërsa ai e mbante për qafe reperen 32-vjeçare – një tablo romantike që tërhoqi vëmendjen e të gjithëve.

Thashethemet për këtë çift nisën që në tetor, por Cardi i ka shmangur gjithmonë komentet e drejtpërdrejta. Megjithatë, shfaqja e tyre në këtë ndeshje duket si një “po” e heshtur për lidhjen.

Në prapaskenë, drama nuk ka munguar: Cardi ka akuzuar ish-partnerin Offset për ndërhyrje në jetën e saj të re, duke pretenduar se ai ka kontaktuar dikë me të cilin ajo po dilte.

Por nëse Cardi B kishte nevojë për një mënyrë për të kthyer vëmendjen nga e shkuara – ja ku e ka gjetur. Me Stefon Diggs përkrah dhe dashurinë në ajër, ajo duket gati për një kapitull të ri.