Red Varaku
Rama po përballet me akuzën më të rëndë të bërë ndonjëherë nga Amerikanët në historinë e Shqipërisë.
SHBA-të e kanë akuzuar drejtpërdrejtë kryeministrin e Shqipërisë se ka korruptuar shefin e kundëzbulimit Amerikan të FBI-së për të goditur liderin e opozitës z. Lulzim Basha si të lidhur me Rusinë, duke bllokuar kështu mekanikisht rrotacionin politik në 2021.
Kjo akuzë përveç se një akuzë penale për korrupsion të lartë që vë në rrezik sigurinë kombëtare të SHBA-ve, është një akuzë që hedh në erë legjitimitetin e kësaj mazhorance, duke e kthyer atë aktualisht në një bandë që ka marrë pushtetin përmes një komploti dhe një grushti shteti.
Në këto kushte jo vetëm shqiptarët, por tashmë edhe ndërkombëtarët, e kanë të qartë që socialistët jo vetëm nuk mund të vazhdojnë të qeverisin më, por ata e kanë detyrim që ta detyrojnë Ramën të largohet për t’iu dorëzuar më pas drejtësisë me qëllim dhënien drejtësi për ngjarjen më të rëndë të këtyre 30 viteve, komplotin kundër opozitës me qëllim asgjësimin e demokracisë.
Kështu e vetmja rrugëdalje mbetet një qeveri teknike me bazë të gjerë, e cila pasi të ketë kryer dhe reformat e nevojshme për rikthimin e funksionimit të sistemit politik dhe demokracisë ta çojë vendin në zgjedhje të parakohshme.
Kuptohet që situata është mjaft delikate dhe kërkohet shumë maturi, sidomos nga socialistët dhe posaçërisht grupi parlamentar i socialistëve. Ata duhet të fillojnë të ushtrojnë presionin e duhur në mënyrë që Rama të largohet pa provokuar destabilitet.
Them provokuar, sepse në këto pozita ku është aktualisht, nuk ka më asnjë shans të provokojë asgjë, sepse drejtësia të cilën tashmë e drejtojnë ekskluzivisht Amerikanët nëpërmjet një kryeprokurori të emëruar drejtpërdrejtë prej tyre, do të bjerë si hanxhar jo vetëm mbi të , por mbi të gjithë bashkëpunëtorët e tij në qeveri dhe opozitë, të cilët prej 2008 kanë qenë pjesë e komplotit politik për të asgjësuar demokracinë.
