Presidenti amerikan, Donald Trump, ka kërcënuar Iranin me bombardime dhe tarifa të reja ekonomike nëse Teherani nuk arrin një marrëveshje me Uashingtonin për programin e tij bërthamor.
Në një intervistë telefonike për NBC News të dielën, Trump tha se zyrtarët amerikanë dhe iranianë po zhvillojnë bisedime, por nuk dha detaje të mëtejshme.
“Nëse nuk arrijnë një marrëveshje, do të ketë bombardime”, deklaroi Trump.
“Por ka një mundësi që, nëse nuk bëjnë një marrëveshje, unë do t’u vendos tarifa të dyta, ashtu siç bëra katër vjet më parë”, shtoi Trump.
Gjatë mandatit të tij të parë (2017-2021), Trump e tërhoqi SHBA-në nga marrëveshja e vitit 2015 midis Iranit dhe fuqive botërore, e cila vendoste kufizime të rrepta mbi aktivitetet bërthamore të Teheranit në këmbim të lehtësimit të sanksioneve. Ai gjithashtu rivendosi sanksione të ashpra ndaj Iranit. Si pasojë, Republika Islamike ka tejkaluar kufijtë e dakordësuar, duke përshkallëzuar programin e saj të pasurimit të uraniumit.
Irani ka refuzuar deri tani paralajmërimin e Trumpit për të arritur një marrëveshje.
Presidenti i Iranit, Masud Pezeshkian, ka hedhur poshtë publikisht mbajtjen e bisedimeve me Uashingtonin për programin bërthamor të Teheranit.
“Megjithëse mundësia e bisedimeve të drejtpërdrejta midis dy palëve është hedhur poshtë në këtë përgjigje, është theksuar se rruga për bisedime të tërthorta mbetet e hapur”, tha Pezeshkian në një komunikatë televizive më 30 mars.
Zyrtarë të lartë iranianë kishin folur më parë kundër idesë së mbajtjes së bisedimeve bërthamore me Shtetet e Bashkuara, kjo është hera e parë që Irani e refuzon zyrtarisht thirrjen e SHBA-së për negociata.
Që kur Trump u kthye në Shtëpinë e Bardhë, administrata e tij ka deklaruar vazhdimisht se Irani duhet të parandalohet nga sigurimi i armëve bërthamore dhe më herët s’e ka përjashtuar mundësinë e përdorimit të veprimeve ushtarake, nëse Irani shpërfill përpjekjet e Trumpit për bisedime.
Deklaratat e Pezeshkian pritet t’i rrisin tensionet mes Teheranit dhe Uashingtonit në lidhje me programin bërthamor të Iranit.
Fuqitë perëndimore akuzojnë Iranin se po përpiqet fshehurazi të zhvillojë armë bërthamore duke pasuruar uranium në nivele të larta pastërtie, përtej asaj që do të ishte e justifikueshme për një program civil të energjisë bërthamore.
Nga ana tjetër, Teherani këmbëngul se programi i tij bërthamor ka vetëm qëllime paqësore dhe është i dedikuar ekskluzivisht për prodhimin e energjisë.
