Vetëm pak ditë pas sulmit vdekjeprurës ndaj turistëve në Kashmir, India nisi një seri sulmesh me raketa në Pakistan dhe zona të Kashmirit nën administrimin pakistanez.
Operacioni, i quajtur “Operacioni Sindoor”, i ka sjellë të dy vendet në prag të një lufte tjetër dhe shqetësimi për zgjerimin e konfliktit është në rritje.
Ndërkohë ministri indian i Mbrojtjes tha se operacioni po kryhet si pjesë e “angazhimit” për drejtësi për 26 viktimat e dy javëve më parë (25 indianë dhe 1 nepalez).
Por megjithatë, Pakistani, i cili mohon kategorikisht çdo përfshirje në sulmin e 22 prillit, e përshkroi “hakmarrjen” e Indisë si “të paprovokuar”, ndërsa kryeministri Shehbaz Sharif foli për “një akt të neveritshëm agresioni që nuk do të mbetet pa u ndëshkuar”.
Por si arritën përsëri India dhe Pakistani të rikthenin tensionet?
Një histori e konfliktit Indi-Pakistan
Që nga krijimi i tyre në vitin 1947, India dhe Pakistani kanë zhvilluar disa luftëra, shumica e të cilave janë përqendruar në Kashmir.
E para shpërtheu vetëm disa muaj pas ndarjes, duke përfunduar me një armëpushim të ndërmjetësuar nga OKB-ja në vitin 1949 që ndau rajonin, por i la të dy kombet ta pretendonin atë të plotë.
Në vitin 1965, ata luftuan përsëri kur forcat pakistaneze kaluan në Kashmirin e administruar nga India, duke çuar në beteja të ashpra tokësore dhe ajrore.
Në vitin 1971, shpërtheu lufta në Pakistanin Lindor, ku India mbështeti forcat e pavarësisë, duke çuar përfundimisht në krijimin e Bangladeshit.
Konflikti i Kargilit i vitit 1999 pa trupat pakistaneze të infiltroheshin në Kashmirin e administruar nga India; ishte përplasja e parë midis rivalëve të armatosur me armë bërthamore, duke shkaktuar alarm global.
Në vitet e fundit, tensionet u rritën pas sulmeve militante: India nisi “sulme kirurgjikale” në vitin 2016 pas sulmit në Uri dhe kreu sulme ajrore pranë Balakot në vitin 2019 pas bombardimeve në Pulwama.
Pakistani u përgjigj me inkursionet e veta ajrore, duke shënuar një nga përshkallëzimet më të rrezikshme që nga Kargil./ LIberale.al
