Një oficer policie britanik ka shpëtuar pa lëndime serioze pas një aksidenti të rëndë që ndodhi në lagjen Yardley të Birminghamit, ku furgoni zyrtar me të cilin po udhëtonte u përplas nga një veturë tjetër dhe u rrokullis në mes të rrugës.
Ngjarja ka ndodhur përpara se ekipet emergjente të mbërrinin në vendin e aksidentit. Kalimtarët e rastit reaguan menjëherë dhe bashkuan forcat për të ndihmuar policin që kishte mbetur i bllokuar brenda automjetit të përmbysur.
Në një video amatore të publikuar nga dëshmitarë okularë, shihet furgoni i policisë i rrokullisur në rrugë ndërsa sirenat vazhdonin të dëgjoheshin. Dy burra shihen duke ndihmuar oficerin të dalë nga automjeti, ndërsa një tjetër kërkonte ndihmë nga kalimtarët e tjerë.
Sipas njoftimit të dhënë nga zëdhënësi i policisë britanike, fatmirësisht oficeri nuk ka pësuar lëndime të rënda dhe po kryhen hetime për të zbardhur shkaqet e aksidentit.
