Në prag të zgjedhjeve të 11 majit, deputeti i Partisë Demokratike, Xhelal Mziu, ka publikuar disa video në rrjetet sociale, duke akuzuar Partinë Socialiste për shpërndarje parash në këmbim të votave në fshatin Radovesh, Gollobordë, Dibër.
Në pamjet e publikuara, shihen disa persona duke u përfshirë në një përplasje, ndërsa Mziu pretendon se një punonjës i Policisë Bashkiake në Bulqizë, Ndriçim Sula, së bashku me mbështetës të PS-së, kanë shpërndarë para për të siguruar vota. Ai shton se dy qytetarë që po filmonin aktivitetin janë dhunuar nga punonjësi i policisë dhe persona të tjerë të lidhur me PS-në.
Mziu ka etiketuar këtë veprim si një tentativë për blerje të votave dhe ka kërkuar që organet kompetente të ndërhyjnë për të ndaluar këto praktika. Ai ka theksuar se është e domosdoshme që zgjedhjet të zhvillohen në kushte të ndershme dhe pa ndikime të jashtme.
