Një ngjarje tragjike ka ndodhur në Finlandë, ku dy helikopterë civilë janë përplasur në ajër dhe si pasojë kanë humbur jetën pesë persona. Aksidenti ndodhi pranë aeroportit të qytetit Eura.

Sipas Byrosë Kombëtare të Hetimeve të Finlandës (NBI), në njërin helikopter ndodheshin dy persona dhe në tjetrin tre. Fatkeqësisht, asnjë prej tyre nuk ka mbijetuar. Trupat e viktimave u gjetën të shpërndarë në një distancë rreth 100 metra nga njëri-tjetri.

Të dy helikopterët po udhëtonin nga kryeqyteti i Estonisë, Tallinn, drejt një zone të quajtur Piikajärvi në qytetin Kokemäki, jo shumë larg vendit ku ndodhi përplasja.

Autoritetet finlandeze morën sinjalin për aksidentin në orën 12:35 dhe reaguan menjëherë, por kur shkuan në vendngjarje, konstatuan se të gjithë pasagjerët kishin ndërruar jetë.

Aktualisht po zhvillohen hetime për të kuptuar shkakun e aksidentit. Ekspertët po shikojnë nëse helikopterët kanë mbajtur distancën dhe lartësinë e duhur gjatë fluturimit.

Hetimi po bëhet në bashkëpunim mes autoriteteve të Finlandës dhe Estonisë, ndërsa ekipet e sigurisë ajrore ndodhen në vendin e ngjarjes për të analizuar çdo detaj që mund të ndihmojë në zbardhjen e kësaj tragjedie.