“Çdo njeri është biri i Zotit, Zoti nuk refuzon askënd, ai është baba. Kushdo që nxit urrejtje në Kishë kundër lëvizjes LGBT është i infiltruar”, tha Papa Françesku duke iu përgjigjur një vajze që e pyeti nëse e dinte kuptimin e fjalës “jo binare”, në kuadër të një bisede me dhjetë të rinj.

“Nuk kam të drejtë të përjashtoj askënd nga Kisha – tha Papa – jo vetëm kaq, detyra ime është të mirëpres gjithmonë. Kisha nuk mund t'ia mbyllë derën askujt". Menjëherë më pas, Papa kritikoi ata që me Biblën si referencë justifikojnë përjashtimin e lëvizjes LGBT nga komuniteti kishtar.

"Këta njerëz janë të infiltruar që përfitojnë nga Kisha për pasionet e tyre personale, për mendjengushtësinë e tyre personale - vazhdoi ai - është një nga korruptimet e Kishës". Biseda e gjatë mes Bergoglios dhe grupit të të rinjve, të gjithë spanjisht-folës, nga mosha 20 deri në 25 vjeç, është pjesë e një projekti të titulluar "Amen. Francesco replies" në të cilin përfshihen tema të tilla si marrëdhëniet midis komunitetit LGBT dhe kishës.

Regjistruar në Romë në qershor 2022, në një ndërtesë në lagjen Pigneto në Romë, në atë që duket të jetë një intervistë e vërtetë, Papa nuk iu shmang asnjë pyetjeje, madje as atyre të pakëndshme për seksin, masturbimin dhe pornografinë. Duke folur me një grua të re që shet përmbajtje pornografike në internet, Papa thotë: "Ata që janë të varur nga pornografia janë sikur të ishin të varur nga një drogë që i mban në një nivel dhe që nuk i lejon të rriten".

Dhe për temën e masturbimit, Papa vazhdoi të shpjegonte se "seksi është një nga gjërat e bukura që Zoti i ka dhënë njeriut. Të shprehesh seksualisht është një thesar". “Seksi ka dinamikën e vet, ka arsyen e vet të ekzistencës, shprehja e dashurisë është ndoshta e gjithë pika e aktivitetit seksual. Pastaj çdo gjë që e tërheq zvarrë tek ju dhe e largon nga ai drejtim, e ul aktivitetin tuaj seksual.'/Liberale.al